Almatyda qarııany soqqyǵa jyqqan adam ustaldy
ALMATY. QazAqparat – Almatylyq polıtseıler qarııany kólik turaǵynda soqqyǵa jyqqan buzaqyny ustady, dep habarlaıdy QazAqparat tilshisi.
Túrksib aýdandyq polıtsııa basqarmasynyń málimetinshe, Almatyda er adam qarııa úıiniń janynda ıtpen serýendep júrgen kezinde uryp ketken. Oqıǵa J.Moldaǵalıev kóshesinde bolǵan.
«Egde adam ıtpen tańǵy saǵat altylar shamasynda serýendep júrgen kezinde ıti kólik turaǵyna qaraı júgirgen. Ittiń sońynan ergen ol kenetten soqqyny sezgen, belgisiz sebeptermen beıtanys bireý basynan uryp, jaǵyn syndyryp, oqıǵa ornynan qashyp ketken. Qart adam jaraqattan qulap, biraz ýaqyt trotýarda qansyrap jatyp qalǵan. Ótip bara jatqan adamdardyń biri taıaq jegen adamdy baıqap, oǵan jedel járdem jáne polıtsııany shaqyrǵan. Jábirlenýshi qashyp ketken er adamnyń kóliginiń markasyn aıta almady. Biraz ýaqyttan keıin aýdannyń ýchaskelik polıtsııa qyzmetkerleri kúdiktini anyqtady. Ol ustalyp, kinásin moıyndady», - dedi Túrksib aýdandyq polıtsııa basqarmasynyń bastyǵy Erkin Amantaev.
Qazirgi ýaqytta kúdiktige qatysty Qazaqstan Respýblıkasy Qylmystyq kodeksiniń 107-baby (Densaýlyqqa qasaqana aýyrlyǵy ortasha zııan keltirý) boıynsha qylmystyq is qozǵaldy.
