Almatyda Qarǵaly, Aqsaı sý jınaǵyshtaryn iske qosýǵa daıyndyq júrip jatyr

ALMATY. QazAqparat – Almaty qalasynyń Naýryzbaı aýdanynda aýyz sý máselesin sheshý úshin eki sý jınaǵysh pen 104,2 km ınjenerlik jeliler salynyp jatyr. Bul týraly qala ákimi Erbolat Dosaev aıtty, dep habarlaıdy QazAqparat tilshisi.

Naýryzbaı aýdanynda Qarǵaly sý jınaǵyshyn salý jumystary 92%-ǵa oryndaldy, qurylys jumystary kelesi jyldyń kókteminde aıaqtalýy tıis.

«Sý jınaǵyshtyń ózin 2023 jyldyń maýsym aıynda paıdalanýǵa beremiz. Obektini iske qosý óndiristik qýattylyqty táýligine 15 myń tekshe metrge deıin 2 ese arttyrýǵa múmkindik beredi. Nátıjesinde «Qaraǵaıly», «Quramys» jáne «Taýsamaly» shaǵyn aýdandaryna úzdiksiz sapaly sý beriletin bolady.

Aqsaı sý jınaǵyshy boıynsha jer qazý jumystary júrip jatyr. Bul obektini 2025 jyldyń III toqsanynda paıdalanýǵa berý josparlanǵan jáne ol 100 myń turǵyndy aýyz sýmen qamtamasyz etýge múmkindik beredi», - dedi Erbolat Dosaev.

Ol sondaı-aq, «Taýsamaly», «Shuǵyla», «Aqjar» shaǵyn aýdandaryna josparlanǵan 104,2 km jeliniń 79,6 km salynyp bitkenin, qalǵan 24,6 km 2023 jyldyń maýsym aıyna deıin aıaqtalatynyn málimdedi.