Almatyda kardıolog mamandar 283 adamdy tegin qarap shyqty
ALMATY. QazAqparat - Búgin Almatyda 283 adam kardıologtardyń tegin keńesin alyp, dıagnostıkalyq apparat arqyly tegin tekserilýge múmkindik aldy, dep habarlaıdy QazAqparat tilshisi.
Turǵyndarǵa qalalyq Kardıologııalyq ortalyq 1-naýryz Alǵys aıtý kúnine, «Nur Otan» partııasynyń qurylǵan kúnine, QHA qurylý kúnine oraı aýqymdy ashyq esik kúnderin ótkizdi.
Búgin 283-ke jýyq adam bilikti mamandardyń keńesin tyńdap, túrli zerthana taldaýlaryn alyp shyqty. 67 adam qan quramyndaǵy qant kórsetkishin bildi.
283 adam - elektrokardıogramma, 153 adam - ehokardıogramma apparatynan tekserilse, jaǵdaıynyń nasharlap júrgenin sezbegen 4 naýqas anyqtalyp, olar aýrýhanaǵa shuǵyl jatqyzyldy. «Dárigerlerdiń ómiriniń ózi kúnde alǵys. Jaqsy emdese adamdar alǵys aıtyp jatady. Búginde ár adam ata-anasyna, dostaryna, joldastaryna, ujymyna úlken alǵys aıtýy kerek. Aýyz toltyryp aıtarlyqtaı jetistigimiz bar. Qazir ortalyqta óte kúrdeli ota túrleri jasalady. Medıtsınamyzdyń qaryshtap damyp kele jatqany úshin Elbasy men Úkimetke kóp alǵys aıtamyz. Qıyn jumysty kúndiz tún demeı, jaýapkershilikpen atqaryp júrgen ózimizdiń qyzmetkerlerge alǵys bildiremiz. Onyń ishinde tek dáriger emes, eden jýýshy, sanıtar, naýqas qasynda júrgen medbıke, kúzetshi, aýla sypyrýshylarǵa da alǵysymyz sheksiz», - dedi ortalyqtyń dırektory Almat Qodasbaev.
Sonymen qatar, búgin ortalyqtyń 15 qyzmetkeri «Nur Otan» partııasy qataryna alynyp, saltanatty túrde olarǵa partııa bıleti tapsyryldy.
Ortalyq ujymy medıtsına salasynda 50 jyldan astam eńbek etken zeınet jasyndaǵy 4 qyzmetkerge de qurmet kórsetip, zeınet demalysyna shyǵaryp saldy. «Alǵys aıtý kúni - bul, eń aldymen, elimizde tynyshtyq pen úndestik, ózara senimdilik pen barlyq qazaqstandyqtarǵa degen qurmettiń ornyǵýyna negiz bolǵan Prezıdenttiń beıbitshilik pen kelisim saıasatynyń saltanaty kúni. Bul - taǵdyr tálkegimen Qazaqstan jerine eriksiz qonys aýdarylǵan túrli etnostardyń mıllıondaǵan ókilderiniń qutty qonysyna aınalǵan qasıetti qazaq jeri men qonaqjaı qazaq halqyna tereń taǵzym belgisi. Alǵys aıtý kúni - qazaqstandyq patrıotızmniń, dostyǵymyz ben birligimizdiń, mádenı san alýandyǵymyzdyń jarasqan kúni, sebebi, Elbasy 130-dan asa etnostyń árqaısysy óziniń qaıtalanbas órnegin salýynyń nátıjesinde bizdiń Birtutas ultymyz biregeı artyqshylyqtar ıesine aınalǵanyn atap ótken bolatyn», - dedi uıymdastyrý-ádistemelik bólimniń dárigeri Esbol Tóleý.
Ortalyq qyzmetkerleri uıymdastyrǵan is-shara joǵary deńgeıde ótti. Kelgenderdiń ishinde kóńili tolmaǵan adam bolǵan joq. Sonymen qatar, qyzmetkerler atyna Alǵys hattar tústi. 
Aıta ketý kerek, atalǵan ortalyqta jylyna 5 500 túrli kúrdeliligi san alýan ota jasalady.
