Almatyda qaraýsyz qalǵan mysyqtar úshin arnaıy úıshikter ornatylyp jatyr

ALMATY. QazAqparat - Almatyda qaraýsyz qalǵan mysyqtarǵa arnalǵan úıshikter ornatylýda. Bul rette Medeý, Almaly jáne Bostandyq aýdandarynda qaraýsyz qalǵan janýarlarǵa qolaıly jaǵdaılar jasalǵan. Bul týraly Almaty ákimdiginiń baspasóz qyzmeti málim etti, dep habarlaıdy QazAqparat tilshisi.

Ákimdiktiń málimeti boıynsha joba «Animal Security» qoǵamdyq qorynyń bastamasymen Almaty qalasynyń kásipkerlik jáne ınvestıtsııalar basqarmasymen birlesip «Janýarlarmen jaýapty qarym-qatynas týraly» Zańdy iske asyrý aıasynda demeýshilik qarjy esebinen iske asyrylýda.

«Qaraýsyz qalǵan mysyqtarǵa arnalǵan baspana mysyqtardy kútetin, tazalyqty qamtamasyz etetin jáne dezınfektsııalaıtyn turǵyndar arasynda jaýapty kýratorlar bolǵan kezde beriledi. Búginde Almatyda qorektendirgishteri bar 20 úıshik ornatyldy, óndiriste taǵy 50-ge jýyǵy bar. Mundaı úıshikterde turatyn barlyq mysyqtar zararsyzdandyrylǵan, parazıtterden tazartylǵan, saý jáne turǵyndar úshin qaýipsiz. Ornatylǵan úıshikterdiń odan ári tazalyǵy men saqtalýyn jaqyn mańdaǵy úılerdiń turǵyndary qadaǵalaýǵa mindettenedi», - delinedi habarlamada.

Qalanyń ár aýdanynda janýarlarǵa monıtorıngti erikti negizde zoobaqylaý uıymdarynyń ishinen kýratorlar júzege asyratyn bolady. Qazirgi ýaqytta janýarlar kýratorlarynyń úılestirýshisi «Animal Security» QQ, onyń basshysy – Natalıa Sýljık bolyp tabylady.
Úıshikterdi ornatýǵa tómendegi telefon nómirleri arqyly qoǵamdyq uıymdarǵa ótinish berýge bolady:
1. Medeý, Alataý jáne Jetisý aýdany: Natalıa Sýljık
[phone];
2. Bostandyq aýdany: Vladımır Teplıakov [phone];
3. Almaly aýdany: Irına Mıhaılova [phone];
4. Áýezov aýdany: Zınaıda Savenkova-Kýshmanova [phone];
5. Naýryzbaı aýdany: Natalıa Kravtsova [phone], Alıa [phone];
6. Túrksib aýdany: Vıktorııa Vorstrýhına [phone].
Eske salsaq, Almatyda qaraýsyz qalǵan janýarlarǵa arnalǵan úıshikter ornatý boıynsha pılottyq joba alǵash ret bıyl naýryz aıynda bastalǵan bolatyn.

«Joba qala turǵyndary arasynda kóptegen oń pikirler týdyrdy. Búginde janýarlardy qorǵaý qorlaryna 500-den astam ótinim kelip tústi. Qoǵamdyq zoobaqylaý uıymdarynyń josparlaryndaǵy kelesi kezeń - qaraýsyz qalǵan ıtterge arnalǵan pıtomnıkterdi ornatý jobasy bolady», - dep habarlady ákimdiktiń baspasóz qyzmeti.