Almatyda qarasha aıynda eski úılerdi súrý baǵdarlamasy boıynsha jańa turǵyn úı salý qurylysy bastalady -- Ahmetjan Esimov
ALMATY. 25 qazan. QazAqparat - Almatyda salynǵanyna 50 jyldan asqan qamystan turǵyzylǵan eski 1047 turǵyn úı bar.
Ony qala ákimi Ahmetjan Esimov búgin «Aqbulak» jáne «Alǵabas» yqsham aýdandaryndaǵy turǵyn úı nysandaryna uıymdastyrylǵan baspasóz týry kezinde aıtty.
«Qarasha aıynda eski qamys úılerdiń ornyna salynatyn 4-5 qabatty ekonom synypty jańa úılerdiń qurylysyn eki aýdanda bastaımyz, Jeltoqsanda olar taǵy eki aýdanmen tolyǵyp, al aqpanda qalǵan eki aýdan qosylady. Jańadan qurylǵan Alataý aýdanynan basqa», - dedi A.Esimov. Ahmetjan Smaǵululynyń sózine qaraǵanda, bul baǵdarlamanyń quny 21,2 mıllıard teńgeni quraıdy. Onyń 4 mıllıardy eski úılerdiń turǵyndaryn kóshirý úshin salynatyn úılerge, 17,2 mıllıardy bosatylǵan alańdarǵa jańa turǵyn úı salýǵa jumsalady. Alǵashqy kezekte buzylatyn eski úılerdiń turǵyndaryn kóshirý úshin 559 páterli 12 turǵyn úı salynady. Odan keıin 55 eski úı buzylyp, onyń ornyna 2500 páterli 54 jańa úı turǵyzylady.
