Almatyda «Qarap otyrma!» respýblıkalyq aktsııasynyń qorytyndysy shyǵaryldy
ALMATY. 15 shilde. QazAqparat /Názıra Eleýhan/ - Almaty qalasynda 11-15 shilde aralyǵynda ІІO-da arnaıy esepte turatyn balalar men jasóspirimder arasynda oryn alatyn qylmystardyń aldyn-alýǵa baǵyttalǵan respýblıkalyq «Qarap otyrma!» atty aktsııasy bolyp ótti.
Aktsııa barysynda Almatyda tirkelgen jaǵdaıy tómen 1000 otbasynda 1300 jasóspirim tárıelenip jatqandyǵy anyqtalǵan.
«Bul aktsııa barysynda biz jaǵdaıy tómen otbasylardyń úılerine kelip, arnaıy esepte turatyn balalardy jazǵy demalys kezinde túrli sporttyq úıirmelerge baýlý men jazǵy demalys lagerlerine jiberý úshin túrli sharalar uıymdastyrdyq. Іs-shara barysynda 36 jasóspirim qala mańyndaǵy lagerlerge jiberilse, 15 bala aýla klýbtaryndaǵy sport úıirmelerine qatysýǵa múmkindik aldy», - dedi Almaty qalasy ІІD-niń Qoǵamdyq qaýipsizdik basqarmasy bastyǵynyń orynbasary, polıtsııa polkovnıgi Aıgúl Shópshekbaeva.
Ol sonymen qatar: «Kámelettik jasqa tolmaǵandar isi jónindegi ınspektorlar halyq kóp shoǵyrlanatyn oryndar men kafelerde, túngi oıyn-saýyq oshaqtarynda, reıd júrgizip, kóshe boıynda tentirep, qaıyr surap júrgen balalardy áshkereledi», - dedi. Ol sharalardyń arqasynda kámeletke jasy tolmaǵan 38 balanyń 3-ýi jumysqa tartylǵandyqtary anyqtalyp, tolyq málimetter halyqty áleýmettik qorǵaý basqarmalaryna jóneltilgen. Endi jasóspirimderdiń eńbek kúshin paıdalanǵan jumys berýshilerge qatysty mindetti túrde tıisti sharalar qoldanylmaq.
Aktsııa barysynda sondaı-aq, túngi ýaqyt ishinde de keshendi tekserýler júrgizilgen. «Túngi saǵat 23.00-den keıin qala kóshelerinde ata-anasynyń qaraýynsyz júrgen 60-tan asa jasóspirim polıtsııa organdaryna jetkizilip, olardyń ata-analaryna aıyppul salyndy. Qazirgi kezde 905 bala arnaıy esepke alyndy. Olarǵa qatysty túrli sharalardy uıymdastyrýǵa qalalyq ákimshilik 120 mıllıon teńge qarjy bólip otyr. Al, jaǵdaıy tómen otbasynan shyqqan 1642 bala qala syrtyndaǵy ártúrli lagerlerde demalýda. Mektep janynan ashylǵan túrli úıirmelerge 8 myń jasóspirim qatyssa, aýla klýbtaryna 4,5 myń oqýshy barýda», - dedi polkovnık A. Shópshekbaeva. Onyń aıtýynsha, «Qarap otyrma» aktsııasynyń sońǵy kúnderi taǵy da 14 jaǵdaıy tómen otbasy anyqtalyp, olardyń 3-ýine qatysty ata-ana quqyǵynan aıyrý máselesi qaralýda.
Kámelettik jasqa tolmaǵandar jónindegi ınspektsııanyń málimetine qaraǵanda, qala boıynsha jazǵy demalys kezinde taǵy da 143 401 bala túrli sharalarǵa qatystyrylatyn bolady.
