Almatyda karantınge qaramastan túngi klýb jumys istegen: 150 adamǵa aıyppul salyndy

ALMATY. QazAqparat - Almatyda túngi klýbtyń jumysyn monıtorıng toby jaýyp tastady. 150-den astam adamǵa aıyppul salyndy, dep habarlaıdy QazAqparat tilshisi.

Almaty qalasy ákimdiginiń baspasóz qyzmeti málim etkendeı, Medeý aýdanynyń monıtorıng toby 21 naýryz saǵat 23.30-da Qurmanǵazy kóshesi, 25 mekenjaıynda ornalasqan Boom Bar (buryn The Artist ataýymen belgili bolǵan) túngi klýbyna kelgenderdi ustady.

Bul nysan qalanyń bas memlekettik sanıtar dárigeriniń qaýlysyn buzdy.

Monıtorıng toby kelgen kezde mekemede shamamen 150-170 adam bolǵan.

Jumys rejımin buzýmen qatar, adamdardyń kóp jınalýyna tyıym salý, maska rejımi, áleýmettik qashyqtyq sııaqty epıdemıologııalyq talaptardyń saqtalmaýy tirkeldi.

Zańdy jáne jeke tulǵalarǵa ákimshilik buzý jáne aıyppul salý týraly hattama jasalady.