Almatyda karantınge qaramastan meıramhanalarda toı ótken
ALMATY. QazAqparat - Bir apta ishinde Almatyda karantın sharalaryn buzǵany úshin 40-qa jýyq kásipkerlik nysanyna aıyppul salyndy, dep habarlaıdy QazAqparat tilshisi.
Almaty qalasy taýarlar men qyzmetterdiń sapasy men qaýipsizdigin baqylaý departamentinde monıtorıngi toby bir aptada 39 nysan men 83 jeke tulǵanyń karantın rejımin buzǵanyn anyqtady. Olarǵa jalpy 16 mln 376 myń teńge aıyppul salyndy. Ákimshilik sottyń qaraýyna 1 materıal jiberildi.
Kásipkerlik sýbektilerinde negizinen dezınfektsııa quraly bolmaǵan, jumys rejımi, maska rejımi buzylǵan.
«Almaty qalasy Túrksib aýdanynyń monıtorıng toby «Lamazı» meıramhanasynda 60 adamǵa arnalǵan qudalyq ótkenin anyqtady. Osyǵan uqsas zańbuzýshylyq Medeý aýdanyndaǵy «Aılına» meıramhanasynda tirkelgen. Kásipkerlerge hattama toltyrylyp, 230 AEK kóleminde aıyppul salyndy», - dedi departament ókili.
17 tamyzdan bastap osy ýaqytqa deıin monıtorıng toptary 9 myńnan astam tekserýge bardy. Ákimshilik buzýshylyqtar týraly 3 756 hattama toltyryldy. Óz erkimen 1 635 nysan qyzmetin toqtatty. Maska rejımin buzǵany úshin - 3 366 jeke tulǵaǵa, onyń ishinde Arbat aýmaǵynda 69 adamǵa aıyppul salyndy. Qoǵamdyq kólikte 27 tamyzdan beri maska taqpaǵany úshin 61 jeke tulǵaǵa aıyppul salyndy.
Esterińizge sala keteıik, Almatyda 6 monıtorıng toby karantın sharalarynyń saqtalýyn baqylaýda. Onyń quramyna ákimdik ókilderi, taýarlar men qyzmetterdiń sapasy men qaýipsizdigin baqylaý departamentiniń, sondaı-aq polıtsııa qyzmetkerleri kiredi.
