Almatyda karantınge qaramastan karaoke-bar men túngi klýb jumys istep turǵan
ALMATY. QazAqparat - Almatyda karaoke-bar men túngi klýbtyń ıeleri jazalandy, Bostandyq jáne M.Áýezov aýdandarynda ornalasqan eki mekeme karantınge qaramastan jumys istegen, dep habarlaıdy QazAqparat tilshisi.
Tártip saqshylary klýbtarǵa kelgen kezde ishinde adam kóp bolǵan. Bireýler týǵan kún toılap jatsa, basqalary kópten beri kezdespegenderine oraı jınalǵan.
«Jergilikti turǵyndar 4-yqsham aýdanda túngi klýbtyń jumys istep turǵany týraly polıtsııaǵa habarlaǵan. Turǵyndardyń belsendiligi úshin rızashylyǵymyzdy bildiremiz. Tekserý nátıjesinde osy mekemeden bizdiń bólimge 30 adam jetkizildi, olardyń 6-ýy personal. Klýb qyzmetkerleriniń aıtýynsha, mekeme 32 jastaǵy qojaıynynyń buıryǵymen jumys istegen. Adamdar alkogol iship, bı bılep, qorqor shekken. Aıtpaqshy, munyń barlyǵy ınfektsııanyń taralýynyń tikeleı sebepshi bolatyn faktorlar. Ókinishke oraı, muny azamattar bile bermeıdi. Biraq karantındi saqtaý sharalary, eń aldymen, ózimizdiń qaýipsizdigimizge baǵyttalǵan», – dedi M.Áýezov aýdandyq polıtsııa basqarmasynyń bastyǵy Álisher Tursynbetov.
Bostandyq aýdanynyń polıtsııa qyzmetkerleri jumys istep turǵan karaoke klýbty áshkereledi. Munda 12 adam bolǵan. Bul jerde kelýshilerge erotıkalyq massajǵa deıin kóptegen qyzmet usynyldy.
«Ustalǵandarǵa qatysty QR ÁQbK-niń 476-baby 6-bólimi boıynsha ákimshilik hattama toltyryldy. Sot sheshimimen olardyń 9-y ákimshilik qamaýǵa alyndy, qalǵandaryna 10 AEK mólsherinde aıyppul salyndy. Biz azamattardy, onyń ishinde kásipkerlik sýbektilerin tótenshe jaǵdaı jáne karantın erejelerin sondaı-aq, olardyń talaptaryn qatań saqtaýǵa shaqyramyz. Áıtpese, sanıtarlyq-epıdemıologııalyq normalardy buzǵany úshin ákimshilik jáne qylmystyq jaýapkershilik qarastyrylǵan», – dedi Bostandyq aýdandyq polıtsııa basqarmasynyń bastyǵy Dáýren Ótebaev.
