Almatyda karantınge baılanysty elektr qýatyn tutyný kólemi azaıǵan
ALMATY. QazAqparat – Almatyda karantınge baılanysty kommýnaldyq jelilerge túsetin júkteme kóbeıgen. Bul týraly búgin Almatyda qalalyq Energetıkalyq tıimdilik jáne ınfraqurylymdyq damý basqarmasynyń basshysy Áset Masabaev onlaın brıfıng barysynda aıtty, dep habarlaıdy QazAqparat tilshisi.
«Júkteme óte ulǵaıdy. Sýmen qamtý, elektr energııasymen qamtý boıynsha kóp saýal keledi. Ótinimder 20%-ǵa artty. Óıtkeni, kóp adamdar karantınde úıinde otyr. Energokeshender qalypty rejimde jumys istep tur. Eshqandaı oqys jaǵdaı bolmaıdy degen úmittemiz», - dedi basqarma basshysy.
Onyń aıtýynsha, elektr energııasyn tutyný kórsetkishi turǵyndar arasynda artqan.
«Biraq ónerkásip oryndary jumys istemeı turǵandyqtan qalada jalpy elektr energııasyn tutyný 18-19 paıyzǵa tómendegen. Sý men elektr energııasyn tutyný turǵyndar arasynda ósti», - dedi Áset Masabaev.
