Almatyda karantınde jatyp bosanǵan áıel provızorlyq ortalyqtan shyqty
ALMATY. QazAqparat - Búgin Almatyda karantınde jatyp bosanǵan 32 jastaǵy áıel provızorlyq ortalyqtan shyqty, dep habarlaıdy QazAqparat tilshisi.
Qalalyq Qoǵamdyq densaýlyq basqarmasynyń habarlaýynsha, patsıent 12 sáýirde №1 Qalalyq klınıkalyq aýrýhanaǵa dene qyzýy 38 gradýsqa deıin kóterilip, jótel, tamaqtyń jybyrlaýy sııaqty kataraldy sımptomdarmen túsken.
Aýrýhanada koronavırýstyq ınfektsııaǵa taldaý alyndy, ol teris nátıje kórsetti.
Bul kelinshektiń alǵashqy ret bosanýy ekenin aıta ketý kerek.
14 sáýirde áıel bosanyp, salmaǵy 3 keli ul bala týǵan.
«Men karantınde bolǵanymda bosanýyma týra keldi. Bul meniń tuńǵyshym bolǵandyqtan óte qatty ýaıymdap edim. Buǵan deıin qasyma serik bolatyn adammen bosanýdy josparlaǵanmyn, biraq tolǵaǵym karantınge týra keldi. Biraq, men medıtsına qyzmetkerleriniń qamqorlyǵynyń arqasynda jalǵyzsyramadym. Meniń ata-anam qala syrtynda turady. Olardyń meni, balany ýaıymdaǵany ras. Statsıonardyń medıtsına qyzmetkerlerine úlken rahmet aıtqym keledi. Karantın kezinde men olardan kóp nárseni úırendim, jas ana kýrsynan óttim dep te aıtýǵa bolady», - dedi Ajar Manhanova.
«Búgin anasy ulymen birge qorytyndy taldaýdan keıin úıine shyǵaryldy. Anasynyń da, sábıdiń de jaǵdaıy jaqsy» – dedi statsıonar basshysy Ernest Qalıev.
Jalpy, qazir №1 Qalalyq aýrýhananyń perzenthana blogynda Covid-19 dıagnozy rastalǵan 6 áıel jatyr. Olardyń ekeýi bosanǵan. Karantınde 24 júkti áıel bar.
