Almatyda karantınde 490 adam jatyr
ALMATY. QazAqparat – Koronavırýs juqpasynyń aldyn alý úshin, saqtyq sharasyna baılanysty Almaty qalasynyń túrli medıtsınalyq nysandarynda 490 adam karantınde jatyr, dep habarlaıdy QazAqparat tilshisi.
Qalalyq Qoǵamdyq densaýlyqty saqtaý basqarmasynyń habarlaýynsha, 1 sanattaǵy elderden kelgen tulǵalarǵa 2 juqpaly aýrýlar, 4 medıtsınalyq ortalyq statsıonarynda tósek oryn jasaqtaldy.
11 naýryzdaǵy málimetke sáıkes qazir Almatyda karantınge 490 adam oqshaýlanǵan.
«Karantınde jatqan tulǵalardyń eshqaısysynda kataraldy ózgerister jáne dene qyzýynyń kóterilýi baıqalmady. QR Bas sanıtarlyq dárigeriniń qaýlysyna sáıkes 1a sanatyndaǵy QHR, Italııa, Ońtústik Koreıa, Iran elderinen kelgen tulǵalar 14 kúndik karantınge oqshaýlanady. 14 kúndik karantın aıaqtalǵan soń dárigerler 10 kún boıy telefon arqyly habarlasyp jaǵdaıyn bilip turady» - dedi qalalyq Qoǵamdyq densaýlyqty saqtaý basqarmasynan.
Basqarmanyń habarlaýynsha, 1b sanatyndaǵy Frantsııa, Germanııa, Ispanııa elderinen kelgen tulǵalar úı jaǵdaıyndaǵy karantınge oqshaýlanady.
«Olarǵa 14 kún boıy qonaqqa barýǵa, týystarmen aralasýǵa shekteý qoıylady. Barlyq tulǵalar karantın talaptaryna qatań baǵynýy tıis. Olaı bolmaǵan jaǵdaıda ákimshilik jazaǵa tartylady. Eger karantındegi adam qonaqqa barǵan bolsa jergilikti emhana qalalyq Taýarlar men qyzmetterdiń sapasyn baqylaý departamentine shaǵym túsiredi. Bul mekeme ary qaraı quqyq qorǵaý organdaryna aryzdanady», delingen habarlamada.
Almatyda qazir 2-sanattaǵy Shveıtsarııa, Ulybrıtanııa, Nıderlandy elderinen kelgen tulǵalar kúndelikti medıtsına qyzmetkerleriniń baqylaýyna alynǵan.
«Medıtsına qyzmetkerleri bul adamdardy tappaǵan jaǵdaıda - kóshi qon qyzmetine, shetel azamattaryn tappaǵan jaǵdaıda qosymsha UQK habarlaıdy», delingen habarlamada.
Búginde Almatyda koronavırýs juqpasyn juqtyrý deregi tirkelgen joq. Qalada koronavırýs juqpasynyń aldyn alý boıynsha arnaıy shtab jumys jasap jatyr. Qalalyq ákimdik sanıtarlyq gıgıenalyq baqylaýdy kúsheıte tústi.
Basqarmanyń habarlaýynsha, barlyq medıtsınalyq mekemeler dárilik zattarmen, medıtsınalyq quraldarmen qamtylǵan. Medıtsınalyq personaldy juqpadan qorǵaý maqsatynda 3 myń jeke bas qorǵanys quraly jasaqtalǵan.
Barlyq medıtsınalyq uıymdar zararsyzdandyrý quraldarymen, antıseptıktermen qamtylǵan.
Juqpanyń aldyn alý úshin mamandar adamdarǵa bet-qoldy jıi sabyndap jýyp, qolǵa spırt antıspetıgin qoldanyp, adam kóp shoǵyrlanǵan jerlerge barmaýǵa keńes beredi.
