Almatyda karantın talabyn buzǵan dámhana men karaoke anyqtaldy

ALMATY. QazAqparat- Almatynyń mobıldi toptary kúsheıtilgen rejımde jumysyn jalǵastyrýda, dep habarlaıdy QazAqparat tilshisi.

Megapolıste 1 maýsymnan 2 maýsymǵa qaraǵan túni belgilengen shekteýlerdi «Tabys» dámhanasy men «Cinema Oskar» karaokesi buzǵan.

Áýezov aýdanynyń monıtorıng toby túngi saǵat 02.00-de jumys istep turǵan «Aqsaı-4» shaǵyn aýdanyndaǵy «Sinema Oskar» karaokesin anyqtady.

«Atalǵan karaoke mekemesi zańdy birneshe ret buzǵan. Buǵan deıin zaldaǵy adam sanynyń kóptigi men maska taǵylmaǵany úshin aıyppul tólegen. Endi jumys rejımin buzǵany úshin ákimshilik jaýapkershilikke tartylady. Bul rette bul nysanǵa Ashyq jobasy boıynsha jumysqa ruqsat berildi. Alaıda, ákimshilik qosymshanyń múmkindikterin paıdalanbaıdy. Sondyqtan bul mekemeni joba aıasynda jumys isteý quqyǵynan aıyrý týraly másele kóterildi»,- dep atap ótti monıtorıng tobynyń ókilderi.

Sonymen qatar, karaokede barlyǵy 20-ǵa jýyq adam boldy. Árqaısymen túsindirme jumystary júrgizildi.

Sol túni Alataý aýdanynyń baqylaý toby «Tabys» dámhanasy maskasyz júrgen qyzmetkerlerdi anyqtady.

Jyl basynan beri tekserýshiler 23 myńnan astam nysandy tekserdi. Onda 2200-den astam karantın sharalaryn buzǵan jaǵdaılar anyqtaldy. Qasaqana buzýshylarǵa qatysty 74 materıal sotqa joldansa, onyń 54-i boıynsha qyzmetti toqtata turý týraly sheshim qabyldandy.

Jalpy bıyl karantındi buzǵandarǵa qatysty 4409 hattama toltyryldy.