Almatyda karantın talabyn buzǵan 34 mekeme anyqtaldy
Monıtorıng tobynyń málimetinshe, Almatynyń kóńil kóterý mekemelerinde áli de jumys rejımin buzatyndar bar, qonaqtardy otyrǵyzý kezinde áleýmettik qashyqtyq saqtalmaıdy, qyzmetkerler maska taqpaıdy.
Almatydaǵy qoǵamdyq tamaqtaný oryndary men kompıýterlik klýbtarǵa júrgizilgen eki kúndik tekserýdiń qorytyndysy osyndaı.
Jınalǵan barlyq materıaldar aýdandyq sanıtarlyq-epıdemıologııalyq baqylaý bólimderine jiberildi.
Barlyq fakti boıynsha ákimshilik aıyppul sharalary qoldanylady.
Almaty qalasynyń sanıtarlyq-epıdemıologııalyq baqylaý departamenti jyl basynan beri monıtorıng toptarynyń 22 600-den astam nysandy teksergenin, onyń 2176-synda karantınniń túrli buzýshylyqtary anyqtalǵanyn naqtylady.
Almaty qalalyq sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylovtyń aıtýynsha, qalada koronavırýsqa qatysty ahýal áli de kúrdeli.
Sondyqtan epıdemıologııalyq talaptardy buzýshy nysandar basty nazarda.
Atap aıtar bolsaq, kóńil kóterý mekemeleri, dámhanalar, meıramhanalar, karaoke, barlar, saýda ortalyqtary.
Sonymen birge, «Ashyq» jobasy aıasynda qyzmet etip jatqan kásipkerlik sýbektileri de tekserilýde.
«Bıyl karantındi jıi buzǵan 74 nysanǵa qatysty mamandandyrylǵan aýdanaralyq ákimshilik sottarǵa materıaldar joldandy, 53 jaǵdaı boıynsha sot sheshimi shyǵaryldy. 37 jaǵdaı boıynsha mekemelerdiń ákimshiligi nysandardyń qyzmetin toqtata otyryp, ákimshilik jaýapkershilikke tartyldy», - dep habarlady Sádýaqas Baıǵabylov.
Sanıtar dárigerlerdiń málimetine sensek, 25 mamyr kúni karantın sharalarynyń 25 buzýshylyǵy anyqtaldy, tek 4 jaǵdaı boıynsha profılaktıkalyq áńgime júrgizildi, qalǵandary boıynsha qatań sharalar qoldaný úshin materıaldar jınaldy.
Mysaly, sol kúni jumys rejımin «Ashyq» jobasynyń qatysýshysy – Almaly aýdanynyń «Seven Cyber Sport» kompıýterlik klýby buzǵan.
Al Áýezov aýdanynyń «Nıýk» kompıýterlik klýby «Ashyq» jobasynyń qatysýshysy bolmaǵannan keıin, jumysyna tyıym salynǵan.
Osyndaı zańbuzýshylyq «Tema» kompıýterlik klýbynda da anyqtaldy.
Dál sol kúni Bostandyq aýdanyndaǵy «Calliano» laýndj barynda jumys rejıminiń buzylýy anyqtaldy.
Sondaı-aq birqatar azyq-túlik dúkenderinde satýshylar kelýshilerge betperdesiz qyzmet kórsetken.
26 mamyr kúni karantın sharalaryn buzǵan 9 mekeme anyqtaldy.
Mysaly, «Ashyq» jobasy boıynsha jumys isteý ruqsat etilgen Almaly aýdanynyń «Chechel pab» dámhanasynda tekserýshiler kelýshiler sanynyń tym kóp ekenin tirkegen.
Olardyń sany zaldaǵy otyratyn oryndar sanynan kóp bolǵan.
Anyqtalǵan buzýshylyqtar arasynda qyzmetkerleri betperde taqpaǵan mekemeler tiziminde «Vostochnyı kvartal» dámhanasy, «Mango sýshı» meıramhanasy, «Veselıdze» dámhanasy bar.
Jumys rejımi Bostandyq aýdanyndaǵy «Versal» meıramhanasynda, «Dreams» laýndj-barynda jáne 40-qa jýyq kelýshi bolǵan «Barmaglot» barynda buzylǵan.
Sádýaqas Baıǵabylov búgingi tańda «Ashyq» boıynsha jumys isteıtin shaǵyn jáne orta bıznestiń 17 sýbektisi tirkelgenin atap ótti. Bul mekemeler arasynda karantın talaptaryn buzatyndar bar.
«Bul protsesske jaýapty qaraý kerek, qosymsha jeńildikterdi paıdalana otyryp, jumys isteýge quqyq beredi, alaıda karantındik sharalardyń saqtalýyn jalǵastyrý kerek», - dep atap ótti Sádýaqas Baıǵabylov.
