Almatyda karantın talabyn buzǵan 128 jeke tulǵaǵa hattama toltyryldy
ALMATY. QazAqparat - Almaty ákiminiń orynbasary Erjan Babaqumarov qala aýmaǵynda shekteý sharalarynyń saqtalýyn baqylaý boıynsha monıtorıngilik toptardyń jumysyn odan ary kúsheıtý jóninde keńes ótkizdi, dep habarlaıdy QazAqparat tilshisi.
Jıynda mobıldi monıtorıngilik toptar jumysynyń jańa algorıtmi qaraldy.
Basty maqsat – koronavırýs ınfektsııasynyń taralýyn boldyrmaý úshin sanıtarlyq-epıdemııalyq talaptardyń qatań saqtalýyn qamtamasyz etý.
Sanıtarlyq erejelerdi jáne shekteý sharalaryn júıeli túrde (2-3 ret) jáne qasaqana buzý faktileri anyqtalǵan jaǵdaıda materıaldar QR ÁqbK 462-babynyń 3-bóligi boıynsha jaýapqa tartý úshin aýmaqtyq prokýrorlarǵa beriledi. Zańnamaǵa sáıkes, buzýshylarǵa uıymnyń qyzmetin toqtata turýǵa deıin jaýapkershilik qarastyrylǵan.
Atap ótetin jaıt, óndiristiń barlyq satylarynda is boıynsha azamattardyń jáne zańdy tulǵalardyń quqyqtaryn (Ákimshilik quqyqbuzýshylyq týraly kodekstiń 744, 746 jáne 747-baptary) qatań saqtaý qamtamasyz etiletin bolady.
Almatyda epıdemııaǵa qarsy sharalardyń oryndalýy boıynsha uıymdar men nysandarǵa tekserý kúndelikti júrgiziledi. Osy maqsatta aýdandyq ákimdikter janynda 26 monıtorıngilik top bar.
Osy jyldyń 8 qazanynan bergi kezeńde monıtorıngilik toptar 1972 nysandy qamtydy. Olardyń ishinde 493 obektide karantındik, sonyń ishinde maska rejıiminiń buzylýy anyqtaldy. Jeke tulǵalarǵa qatysty QR Ákimshilik quqyqbuzýshylyq týraly kodekstiń 425-babynyń 1-bóligi boıynsha ákimshilik quqyqbuzýshylyq týraly 128 hattama toltyryldy.
