Almatyda karantın sharalaryn buzǵan birneshe restobar anyqtaldy
Monıtorıng top ókilderiniń aıtýynsha, qalada Ashyq jobasyna kirmeıtin mekemelerdiń qyzmet kórsetip jatqandary anyqtalýda. Mysaly, Bostandyq aýdanyndaǵy 1Gog restobarynda zań buzýshylyq boldy. Bul mekeme zańǵa qaıshy áreketterimen tekserýshilerdiń nazaryna birneshe ret túsken.
1Gog mekemesi túngi saǵat 1-ge deıin jumys istedi. Onda 60-qa jýyq adam bolǵan. Nysan basshylyǵyn ákimshilik jaýapkershilikke tartý úshin materıaldar jınaqtaldy.
Restobardaǵy karantındik sharalardy buzýmen qatar, kalıan shegý faktisi anyqtaldy. Eske salsaq, qoǵamdyq oryndarda kalıanǵa tolyq tyıym salynǵan. Tártip buzýshylarǵa qatysty QR Ákimshilik kodeksniń 441-baby 1-bóligi boıynsha ákimshilik hattama toltyryldy. Aıta keteıik, oǵan salynatyn aıyppul kólemi 15 AEK (43 755 teńge). Almatynyń sanıtarlyq dárigerleri kalıannyń zııandy qasıetteri týraly birneshe ret aıtqan, sol arqyly juqpaly aýrýlar, sonyń ishinde koronavırýs ońaı taralady.
Medeý aýdanynyń monıtorıngilik toby 10-nan 11-shi maýsymǵa qaraǵan túni Jibek Joly dańǵylyndaǵy Bacha túngi klýbynda zań buzýshylyqty anyqtady. Mekemede 80-ge jýyq adam bolǵan. Kelýshiler áleýmettik qashyqtyqty saqtamady.
Olardy jaýapkershilikke tartý týraly sheshimdi aýdandyq sanıtarlyq-epıdemıologııalyq baqylaý basqarmasy qabyldaıdy.
Taǵy bir zań buzýshylyq Bostandyq aýdanyndaǵy «Vıvaldı» karaokesinde boldy. Kóńil kóteretin oryn túngi saǵat 2.00-den keıin jumys istep, belgilengen jumys rejımin buzǵan.
Aıta keteıik, jyl basynan tártip buzýshylarǵa qatysty 74 materıal sotqa berildi. Osy jyly Almatyda 20 naýryz ben 11 maýsym aralyǵynda belgilengen shekteýlerdi buzǵan 1112 jaǵdaı anyqtaldy.
Almaty ákimdigi qala turǵyndary men qonaqtaryn karantın rejımin qatań saqtaýǵa, túngi klýbtarǵa, restobarlarǵa, saltanatty is-sharalarǵa, toılarǵa, adam kóp jınalatyn jerge barmaýǵa shaqyrady.
