Almatyda karantın rejımin buzǵandarǵa 78 mln teńgege aıyppul salyndy
ALMATY. QazAqparat – Almatynyń monıtorıng toptary kúsheıtilgen rejmde jumys istep jatyr. 16 zań buzýshylyq boıynsha materıaldar sotqa berildi, dep habarlaıdy QazAqparat tilshisi.
Almatyda koronavırýs ınfektsııasyn juqtyrýdyń 18163 oqıǵasy tirkeldi. Almaty qalasy ákiminiń tapsyrmasy boıynsha sanıtarlyq-epıdemııalyq sharalardyń saqtalýyn baqylaý maqsatynda Almatyda quramyna aýdan ákimdikteriniń, jergilikti polıtsııa qyzmetiniń ókilderi, sondaı-aq «Atameken» kásipkerler palatasynyń qyzmetkerleri engen 32 monıtorıngtik top kúsheıtilgen jumystaryn jalǵastyrýda.
8 qazan men 27 jeltoqsan aralyǵynda 648 monıtorıng sharalary júrgizildi, onyń barasynda 5464 nysan qamtyldy. Sonyń nátıjesinde karantın sharalaryn buzýdyń 1100 faktisi anyqtaldy.
Monıtorıngtik toptar júrgizgen tekserister nátıjesinde kelesi sharalar qabyldandy: karantın sharalaryn saqtalmaǵany úshin ákimshilik quqyqbuzýshylyq jóninde 959 hattama toltyryldy. Jalpy somasy 78,1 mln teńgege zańdy jáne jeke tulǵalarǵa aıyppul salyndy. Júıeli buzýshylyqtar boıynsha 16 materıal sotqa berildi.
Almaty qalasynyń mamandandyrylǵan aýdanaralyq ákimshilik sotyna aýdandar boıynsha tómendegideı materıaldar jiberildi:
- Almaly aýdany - 3 («Aragosta», «Degırmen» dámhanalary, «Doremı» karakokesi);
- Áýezov aýdany - 3 ( «Mıata» laýndj bary, «Almaty» karaoke-bary, «Playstation Go» oıyn klýby);
- Medeý aýdany - 7 («Manana»-2 meıramhanasy, «Otrar bar» JShS (Tantsy) - 4, «Tsentral»-1 dámhanasy, «Hookan Dreems»-1 lanýdj bary, «Global Fýdend» JShS Nebo-1 bary, «Oranjerı Group» JShS restobar-1, «BM Trade Company» JShS «Artıst»-1 bary);
-Túrksib aýdany - 3 («Raıana» meıramhanasy Ilahýnov JK, «Atlantıs» bılıard klýby, Bıjanov R.M. JK, «Provans» dámhanasy.
Sonymen qatar, sot sheshimi boıynsha «Oranjer» restobary («Oranjerı Group» JShS); «Provans» dámhanasy («Dı Sı» JK) jáne «Raıana» dámhanasynyń («Ilahýnov»JK) qyzmeti bir aı merzimge toqtatylyp, ıelerine 100 AEK mólsherinde aıyppul salyndy.
Almaty ákimdigi qala turǵyndary men qonaqtaryn epıdemıologtar belgilegen qaýipsizdik talaptaryn eskerip, betperde rejımin, áleýmettik qashyqtyqty saqtaýǵa jáne múmkindiginshe adamdar kóp jınalatyn oryndarǵa barmaýǵa shaqyrady.
