Almatyda karantın rejımin buzǵandarǵa 74,7 mln teńge aıyppul salyndy
ALMATY.QazAqparat – Almatynyń monıtorıng toptary kúsheıtilgen rejmde jumys istep jatyr.
Karantın rejımin buzǵandarǵa 74,7 mln teńge aıyppul salyndy, dep habarlaıdy QazAqparat tilshisi.
8 qazan men 19 jeltoqsan aralyǵynda 590 monıtorıng sharasy júrgizildi, onyń barysynda 4947 nysan qamtyldy. Sonyń nátıjesinde karantın sharalaryn buzýdyń 1065 faktisi anyqtaldy.
Monıtorıngtik toptar júrgizgen tekserister nátıjesinde kelesi sharalar qabyldandy: karantın sharalaryn saqtamaǵany úshin ákimshilik quqyqbuzýshylyq jóninde 890 hattama toltyryldy. Zańdy jeke tulǵalarǵa jalpy somasy 74,7 mln teńge aıyppul salyndy.
Júıeli zańbuzýshylyqtar boıynsha 15 materıal sotqa berildi:
– Medeý aýdany boıynsha — 6 («Manana» meıramhanasy, «Otrar bar» JShS, «Tsentral» dámhanasy, «Hookah Dreems» laýndj bary, «Global Fýd End» JShS, «Oranjerı Group» JShS restobar);
– Túrksib aýdany boıynsha — 3 («Raıana» meıramhanasy Ilahýnov JK, «Atlantıs» bılıard klýby Bıjanov R.M. JK, «Provans» dámhanasy);
– Almaly aýdany boıynsha — 3 («Aragosta», «Degırmen» dámhanasy, «Doremı» karaokesi);
– Áýezov aýdany boıynsha — 3 («Mıata» laýndj bary, «Almaly» karaoke-bary, «Playstation Go» oıyn klýby).
Sonymen qatar, QR ÁQBtK-niń 462-baby 3-bóliginiń buryn jiberilgen júıeli túrde oryn alǵan buzýshylyqtary boıynsha sot sheshimderi bar:
- jeke kásipker Renat Bıjanovqa 277 800 tg kóleminde aıyppul salyndy jáne Túrksib aýdany, Namanganskaıa kóshesi, 35 mekenjaıy boıynsha ornalasqan «Atlantis» bılıard klýbynyń qyzmeti 1 aı merzimge toqtatyldy;
- «Suddenly» JShS-ne («Hookan Dreems» kafe bary) 277 800 tg kóleminde aıyppul salyndy, Medeý aýdany, Qaıyrbekov kóshesi, 35a meken-jaıy boıynsha ornalasqan «Hookan Dreems» bar kafesiniń qoǵamdyq tamaqtaný qyzmetterin usyný boıynsha qyzmeti 1 aıǵa toqtatyldy.
Almaty ákimdigi juqtyrý qaýpin azaıtý maqsatynda qala turǵyndary men qonaqtaryn adamdar kóp jınalatyn jerlerge barmaýǵa shaqyrady. COVID-19 aldyn alý sharalaryn kúsheıtip, ózińizge jáne basqalarǵa qaýip tóndirmeýdi eskertedi.
Eske salaıyq, anyqtalǵan buzýshylyq faktileri boıynsha mekeme ıeleri ÁQBtK-niń 425-babynyń 1-bóligi boıynsha ákimshilik jaýapqa tartylyp, buzýshylyqtardy joıý týraly nusqama beriletin bolady. Zań buzýshylyqtar qaıta anyqtalǵan jaǵdaıda zańdy tulǵalar ÁQBtK-niń 462-babynyń 3-bóligi boıynsha ákimshilik jaýapqa tartylatyn bolady. ÁQBtK-niń 462-babynyń 3-bóligi boıynsha ákimshilik jaýapqa tartý týraly máseleni mamandandyrylǵan aýdanaralyq ákimshilik sot qaraıdy. Osy baptyń sanktsııasy nysannyń qyzmetin toqtatýdy kózdeıdi.
