Almatyda karantın rejımin buzǵandardy «Sergek» arqyly anyqtaıdy
ALMATY. QazAqparat - Almatyda kúsheıtilgen karantın rejımin buzýshylardy « Sergek» kameralary arqyly anyqtap, jaýapqa tartady. Bul týraly onlaın-brıfıngte qalalyq PD bastyǵy Qanat Taımerdenov aıtty, dep habarlaıdy QazAqparat tilshisi.
«Biz «Sergek» kameralary túsirgen beınejazbalardy qoldanatyn bolamyz. Bizde bul kameralar qalanyń perımetri boıynsha barlyq 27 blokpostta ornatylǵan. Biz megapolıske kirip-shyqqandardy qadaǵalaımyz jáne planshetterge engizemiz. Sondaı-aq, qalanyń ishinde de «Sergek» júıesin qoldanatyn bolamyz. Bul beınejazbalar bizge sotta adamnyń karantındik rejımdi buzǵanyn dáleldeý úshin qajet», – deıdi Qanat Taımerdenov.
Buǵan deıin, qalada karantındik sharalardy kúsheıtý úshin 26 beket uıymdastyrylatynyn habarlaǵan bolatynbyz.
