Almatyda karantın rejımin buzǵan turǵyndarǵa 93 mln teńge aıyppul salyndy

ALMATY. QazAqparat – Jyl basynan beri karantın rejımin buzǵan almatylyqtarǵa 93 mln teńgeden astam aıyppul salyndy. Bul týraly onlaın brıfıng barysynda qalalyq sanıtarııalyq-epıdemıologııalyq baqylaý departamenti basshysynyń orynbasary Sádýaqas Baıǵabylov málim etti, dep habarlaıdy QazAqparat tilshisi.

Spıker atap ótkendeı, qaladaǵy monıtorıng toptary kúsheıtilgen rejımde jumys istep jatyr.

«Kóptegen shaǵyn jáne orta bıznes nysandary jumys rejımin belsendi túrde ózgerte bastady jáne karantın sharalaryn elemeıdi. Monıtorıng toptardyń tıimdiligi óte joǵary ekenin aıtqym keledi, bul ınfektsııanyń taralýyn shekteýge múmkindik beredi «, - deıdi Sádýaqas Baıǵabylov.

Onyń aıtýynsha, karantın shekteýlerin túngi klýbtar men meıramhanalar kóp buzady. Ol jerge 20-25-30 jas aralyǵyndaǵy jastar barady.

«Joǵaryda atalǵan kóńil kóteretin mekemelerge baratyndardyń 60% -y qyzdar, 40% -y er adamdar. Jastar aýrýdy juqtyryp, ınfektsııany óz otbasy músheleri arasynda taratady «, - deıdi ol.

Sadýaqas Baıǵabylov jyl basynan beri Almatyda 1380-ge jýyq reıdtik is-sharalar ótkizilgenin atap ótti.

«Birinshi qańtardan bastap zańdy jáne jeke tulǵalarǵa barlyǵy 2335 hattama jasaldy, onyń ishinde zańdy tulǵalarǵa jalpy somasy 71 mln teńgege 201 hattama toltyryldy. Sondaı-aq jeke tulǵalarǵa shamamen 93 mln teńgege aıyppul salyndy», - dep tolyqtyrdy S.Baıǵabylov.