Almatyda karantın rejımin buzǵan turǵyndarǵa 234 mln teńge aıyppul salyndy

ALMATY. QazAqparat – Jyl basynan beri karantın rejımin buzǵan almatylyqtarǵa 234 mln teńgeden astam aıyppul salyndy. Bul týraly onlaın brıfıng barysynda qalalyq sanıtarııalyq-epıdemıologııalyq baqylaý departamenti basshysynyń orynbasary Sádýaqas Baıǵabylov málim etti, dep habarlaıdy QazAqparat tilshisi.

Spıker atap ótkendeı, qaladaǵy 40 monıtorıng toby kúsheıtilgen rejımde jumys istep jatyr.

« Jyl basynan beri Almatyda 1687 buzýshylyq anyqtalyp, 3515 hattama toltyryldy. Sonymen qatar, jalpy somasy 234 mln teńgeden astam aıyppul salyndy. Epıdemıologııalyq jaǵdaı ýshyǵyp tursa da megapolıstiń keıbir turǵyndary sanıtar dárigerlerdiń karantındik talaptaryn buzýdy jalǵastyrýda. Buzýshylar arasynda kóńil kóterý oryndarynyń ıeleri kósh bastap tur»,- dedi spıker.

Onyń aıtýynsha, qazirgi jaǵdaıda barlyq buzýshylyqtar aýrý juqtyrǵandar sanynyń kóbeıýine alyp kelýi múmkin.

«Úılený toılary men toılarǵa barý, tań atqansha túngi klýbtarda qalý arqyly adamdar ózderine de, ózderiniń jaqyndaryna da koronavırýspen aýyrý qaýpin tóndiredi. Almatyda mýtatsııalanǵan jańa shtamdardyń tirkelgenin atap ótken jón, olardy bizdiń azamattar áldeqaıda qıyn ótkerýde», - dedi sanıtarlyq-epıdemıologııalyq vedomstvo ókili.

Sádýaqas Baıǵabylov bıznes-qaýymdastyq ókilderi men qala turǵyndaryn koronavırýspen kúreste jaýapkershilik tanytýǵa, qarapaıym sanıtarlyq-epıdemıologııalyq normalardy saqtaýǵa shaqyrdy.