Almatyda karantın kezinde sýǵa shomylýǵa tyıym salyndy
ALMATY. QazAqparat – Búgin Almaty óńirlik kommýnıkatsııalar qyzmetiniń alańynda shomylý maýsymyndaǵy qaýipsizdik sharalary týraly onlaın brıfıng ótti, dep habarlaıdy QazAqparat tilshisi.
Almatyda karantın merziminde ózen-kólderde shomylýǵa tyıym salynady.
Bul týraly Almaty qalasy TJD Azamattyq qorǵanys basqarmasynyń aǵa ofıtseri, maıor Bekbolat Buǵabaev aıtty.
«Almaty aýmaǵy boıynsha 28 shaǵyn ózen aǵady, 26 sý qoımasy bar. Qala ákiminiń 2019 jylǵy 9 shildedegi bekitilgen qaýlysy boıynsha sonyń 4-inde ǵana shomylýǵa ruqsat etilgen. Olar - Saıran kóliniń batys bóligi Tólebı kóshesinen ońtústikke qaraı 200 metr aralyq, Saıran kóliniń shyǵys bóligi Tólebı kóshesinen ońtústikke qaraı 200 metr qashyqtyq, D.Qonaev atyndaǵy ÚAK boıynda ornalasqan Baým toǵaıy jaǵajaıynda, D.Qonaev atyndaǵy ÚAK boıynda ornalasqan «Gúlder» demalys aımaǵynda shomylýǵa ruqsat etilgen», - dedi Bekbolat Buǵabaev.
Mamannyń aıtýynsha, karantın aıaqtalǵansha bul sý qoımalarynda shomylýǵa ruqsat joq.
«QR Bas memlekettik sanıtarlyq dárigeriniń 2020 jylǵy 10 mamyrdaǵy №36 buıryǵyna sáıkes karantın jalǵasyp jatkandyǵyn atap ótken jón. Sondyqtan, ázirshe shomylýǵa ruqsat joq», -dedi B.Buǵabaev.
Departament ókili atalǵan sý qoımalarynan bólek jerlerde shomylǵan adamdar ákimshilik jazaǵa tartylatynyn aıtty.
«Osy jerlerden bólek sý qoımalarynda, taý ózenderinde shomylǵan adamdarǵa birinshi ret eskertý jasalady. Ol eskertý bazaǵa tirkeledi, ekinshi ret sol adam qaıta shomylsa, 2 AEK mólsherinde, ıaǵnı 5556 teńge aıyppul tóleıdi», - dedi spıker.
