Almatyda karantın kezinde mekteptiń saltanatty jıyny qalaı ótedi
ALMATY. QazAqparat – Almaty ákiminiń orynbasary Erjan Babaqumarov pen qalalyq bas sanıtarlyq dáriger Jandarbek Bekshın, qalalyq Bilim basqarmasynyń basshysy Lázzat Jylqybaeva mektep dırektorlarymen kezdesý ótkizdi, dep habarlaıdy QazAqparat tilshisi.
«Basty maqsat – mektep túlekterin qorytyndy attestattaý sharalaryna daıyndyqty pysyqtaý, sanıtarlyq epıdemıologııalyq talaptardy oryndaý, UBT ótkizý protsesiniń talaptaryn oryndaý, 1-synypqa qabyldaý sharttary talqylandy», - dedi qalalyq baspasóz qyzmetinen.
Búginde Almatyda 261 myń oqýshy bar. Bıyl qalada 9 299 túlek mektep bitiredi. Olardyń 8 667-i memlekettik mektepti bitirse, 632-si jekemenshik mektep túlegi.
Qalalyq Bilim basqarmasy taratqan aqparatqa sáıkes:
Bilim berý uıymdarynda oqý jyly 25 mamyrda aıaqtalady.
9-11 synyp oqýshylary úshin qorytyndy attestattaý ótkizilmeıdi.
Negizgi orta jáne jalpy orta bilim beretin mektepti bitirgeni jónindegi attestattaý qazirgi baǵa boıynsha júrgiziledi.
Orta bilim berý uıymdarynyń basshylaryna elektrondy jýrnaldardaǵy baǵalardy túzeýge úzildi-kesildi tyıym salynady.
1-10 synyp oqýshylary úshin saltanatty mektep jıyny qashyqtan ótkiziledi.
11-synyp bitirgen túlekterge attestat tabystaý 3-4 maýsym kúnderi kestege sáıkes barlyq sanıtarlyq-epıdemıologııalyq talaptardy qatań saqtaý arqyly ótedi.
«Saltanatty jıyn tek bitirýshi synyptar úshin ótkiziledi jáne oqýshylardyń arasyndaǵy áleýmettik qashyqtyq keminde 2 metrden kem bolmaýy tıis. Attestatardy tek synyptar boıynsha tabystalady. Bul sharaǵa oqýshylar, olardyń ata-analary men mektep ujymynan qosqanda shamamen 60 adamǵa ǵana qatysýǵa ruqsat etiledi. Bir synyptyń túlekteri men ekinshi synyptyń túlekterine attestat tabystaý sharalarynyń aralyǵy keminde 1 saǵat bolýy tıis. Jıynǵa túlekterdiń otbasynan tek 1-2 ata-ana ǵana kelýi kerek, olardyń egde jastaǵy atalary men ájelerine kelýden bas tartqany jón. Mektepterdiń ákimshilikteri ata-analar komıtetterimen, synyptarmen jáne pedagogıkalyq ujymdarmen túsindirý jumystaryn júrgizýi kerek. UBT barlyq sanıtarlyq-epıdemıologııalyq talaptardy qatań saqtaı otyryp, ádettegi dástúrli formatta ótetin bolady», - dedi ákimdikten.
