Almatyda karantın erejesin buzǵandarǵa 39 mln teńge aıyppul salyndy
ALMATY. QazAqparat – Almatyda karantın rejımin buzǵan mekeme ıelerine 39 mıllıon teńge aıyppul salyndy. Bul týraly Almaty qalasy Polıtsııa departamentiniń basshysy Qanat Taımerdenov onlaın brıfıngte aıtty, dep habarlaıdy QazAqparat tilshisi.
«Karantın rejımin saqtaýdy baqylaý maqsatynda arnaıy monıtorıngtik top qurylǵan bolatyn. Júrgizgen is-sharalar nátıjesinde osy ýaqytqa deıin 3423 adam ákimshilik jaýapqa tartyldy. Onyń 126-sy zańdy tulǵalar. Tájirıbe kórsetkendeı, karantındi keıbir azamattar saqtamaıdy. Azamattar toı toılaıdy, klýbtarǵa barady, kalıan tartady», - deıdi Qanat Taımerdenov.
Sonymen qatar, ol reıd kezinde birqatar zańsyz jumys istegen nysannyń anyqtalǵanyn atap ótti.
«5 saýna, 7 túngi klýb, 32 kafe, 17 meıramhana, 12 massaj salony jáne 7 karaoke klýb anyqtalyp, olardyń ıelerine qatysty ákimshilik kodeks boıynsha 236 aılyq eseptik kórsetkish retinde 39 mln teńge aıyppul salyndy», - dedi ol.
