Almatyda karantın erejesin buzǵan 577 adam qamaýǵa alyndy
ALMATY. QazAqparat – Almatyda osy ýaqytqa deıin karantın rejımin buzǵan 1 965 adamǵa ákimshilik hattama toltyryldy, onyń 577-si qamaýǵa alyndy. Bul týraly Almaty qalasy Polıtsııa departamentiniń basshysy Qanat Taımerdenov brıfıng barysynda aıtty, dep habarlaıdy QazAqparat tilshisi.
Onyń aıtýynsha, karantın bastalǵaly Almaty polıtsııasy qala turǵyndaryna túsindirý jumystaryn jiti júrgizip keledi. Desekte, karantın rejımin buzatyndar sany azaıar emes.
«Jalpy, karantın engizilgennen bastap, sotpen tótenshe jaǵdaı rejımin buzǵany úshin 1 965 adam ákimshilik jaýapkershilikke tartyldy, onyń ishinde 577 quqyq buzýshy ákimshilik qamaýǵa alyndy, 1 054 adamǵa aıyppul salyndy, 334 adamǵa eskertý jasaldy. Sondaı– aq, blokposttardy aınalyp ótip, qalaǵa kirmek bolǵan 397 adam ákimshilik jaýapkershilikke tartyldy, olardyń 169-y qamaýǵa alyndy, 184-ne aıyppul salyndy, 44 adamǵa eskertý berildi», - dedi onlaın brıfıng barysynda Qanat Taımerdenov.
Sonymen qatar ol, qalanyń ishinde ornatylǵan 41 bekette 54 myńnan astam kólik tekserilgenin atap ótti.
