Almatyda karantın erejesin buzǵan 344 adam jaýapqa tartyldy
ALMATY. QazAqparat – Almaty qalasy Bostandyq aýdanynyń 350-ge jýyq turǵyny karantın erejesin buzdy, dep habarlaıdy QazAqparat tilshisi.
Bostadyq aýdandyq polıtsııa basqarmasynyń málimetinshe, qalada karantın rejımin buzǵany úshin 344 adam ákimshilik jaýapkershilikke tartyldy. Mamandandyrylǵan aýdanaralyq ákimshilik sotynyń sheshimimen olardyń 64-i ákimshilik qamaýǵa alyndy, 196-na aıyppul salyndy, taǵy 44 adamǵa eskertý berildi.
«Tótenshe jaǵdaı rejımine baılanysty polıtsııa qyzmetkerleri qyzmettiń kúsheıtilgen nusqasyna aýystyryldy jáne táýlik boıy eki aýysymdyq rejımde qyzmet etedi. Atap aıtqanda, jaıaý patrýlderiniń jumysy qoǵamdyq oryndarǵa, qıylystar men qalanyń kóshelerine baǵyttalǵan. Kásipkerlik sýbektilerin tekserý úshin aýdan ákimdigimen birge arnaıy mobıldi top quryldy», – dedi Bostandyq aýdandyq polıtsııa basqarmasynyń bastyǵy Dáýren Ótebaev.
Sonymen qatar, atalǵan basqarmanyń qyzmetkerleri karantınge jatqyzylǵan ınfektsııa oshaqtaryn oqshaýlaýǵa qatysady.
«Eger azamattar karantın rejımin buzsa, bul jaǵdaıda, QR ÁQbK-niń 476-baby boıynsha quqyq buzýshy ákimshilik jaýapkershilikke tartylady. Osy kúnderi sot otyrysy onlaın rejıminde ótýde», - dep tolyqtyrdy ol.
