Almatyda karantın erejeleri kúsheıtilýi múmkin be
ALMATY. QazAqparat – Karantın erejeleriniń kúsheıtilýi qaladaǵy epıdemıologııalyq jaǵdaıǵa baılanysty. Bul týraly Almaty qalasynyń bas memlekettik sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
Onyń aıtýynsha, elimizde tótenshe jaǵdaı rejımi aıaqtalyp, Almatyda kezeń-kezeńmen kásiporyndar men uıymdar jumysyn qaıta bastady.
«Karantındik rejımge ótkennen keıin biz ınfektsııanyń odan ári taralmaýy úshin qala turǵyndarynan saqtyq sharalarynyń qadaǵalanýyn suradyq. Eger vırýs juqtyrǵandar sany ary qaraı tirkele beretin bolsa, biz saqtyq sharalaryn qaıta qaraımyz jáne eske salýdy jalǵastyra beremiz», - dedi ol.
Sondaı-aq, ol kóptegen elderde qatań sharalar qabyldanǵanyn arqasynda jaǵdaıdyń birqalypty bola bastaǵanyn atap ótti.
«Bizdiń tarapymyzdan da sharalar qoldanylýda. Biz qyzmettiń barlyq baǵyttary - saýda, tamaqtaný, bilim, ónerkásip jáne qurylys, mádenıet jáne sport boıynsha qajetti nusqaýlyqtardy jasadyq. Biz ákimshiliktiń ózi jáne osy uıymdarda jumys isteıtin adamdardyń ózderin, otbasy múshelerin jáne basqalardy qorǵaýǵa múmkindik beretin nusqaýlyqtar ázirledik», - deıdi Jandarbek Bekshın.
Aıta keteıik, búginde Almatyda koronavırýs juqtyrǵandardyń sany 2 939-ǵa jetti, olardyń 1 929-y jazyldy, 10 adam qaıtys boldy.
