Almatyda karantın aımaǵynyń perımetrinde 30 aınalma jol jabyldy
ALMATY. QazAqparat – Almaty polıtsııasy karantın aımaǵynyń perımetrindegi 30 aınalma joldy japty, dep habarlaıdy QazAqparat tilshisi.
Qaladan kirý-shyǵý úshin aınalma joldardy belgileý maqsatynda jedel qyzmet jáne Almaty qalasynyń patrýldik polıtsııa kúshteri Almaty oblysymen shekaralas aýdandarǵa saraptama jasady.
«Saraptama barysynda 30 aınalma jol bary anyqtaldy. Bul joldardyń barlyǵy jabyldy, beton blok ornatyldy. Alataý aýdanynda - 15, Jetisý aýdanynda - 7, Medeý aýdanynda - 1, Naýryzbaı aýdanynda - 4 jáne Túrksib aýdanynda - 3 jolda Ulttyq ulan sarbazdarynan jasaq qoıyldy. Ókinishke qaraı, tájirıbe kórsetkendeı, karantın aımaǵyna kirý úshin zańsyz áreketterge baratyn adamdar barshylyq. Olar bul sharalardyń, eń aldymen, ózderiniń ómiri men densaýlyǵynyń qaýipsizdigine baǵyttalǵanyn túsinbeıtin sııaqty. Arnaıy mamandandyrylǵan aýdanaralyq ákimshilik soty QR ÁQbK 476-baby (tótenshe jaǵdaı erejelerin buzý) boıynsha 47 ákimshilik materıal qaraldy, nátıjesinde 11 adam ákimshilik qamaýǵa alyndy, 36 adamǵa aıyppul salyndy», - deıdi Almaty qalalyq polıtsııa departamentiniń bastyǵy, polıtsııa polkovnıgi Qanat Taımerdenov.
Baqylaý-ótkizý pýnktiniń jazbasyna sáıkes, bir kúnde qalaǵa 1 473 avtokólik kirdi, onyń 484-i - jeńil kólik bolsa, 985 -i - júk kóligi, onyń ishinde 1 443 adam boldy.
Bir kúnde qaladan 1 653 avtokólik shyqty, onyń 544-i - jeńil kólik, al 1104-i - júk kóligi, olardyń ishinde 1 050 adam boldy.
