Almatyda qaraqshylyq shabýyl jasaýmen aınalysqan kólik júrgizýshisi ustaldy
ALMATY. Qyrkúıektiń 14-i. QazAqparat /Ádilet Musahaev/ - Qapshaǵaı qalasynyń turǵyny óziniń ýaqytsha taksıst qyzmetin odan ary tabysty etýdi uıǵaryp, kesh qalǵan 24 jasar júrginshini tonaǵan,
dep habarlaıdy QazAqparat Almaty qalasy ІІD-niń baspasóz qyzmetine silteme jasap.
"Tergeý jumystary barysynda belgili bolǵandaı, tańǵy saǵat 4-te 1-shi Almaty vokzaly mańyna jetý úshin Gogol kóshesi boıynan qyz bala taksı toqtatqan. «Aýdı» markaly kólik ony jetkizip salýǵa kelisip, salonǵa kirisimen qyzdy uryp esinen aıyrady. Qyz esin jıǵanda qala shetinde jatqanyn baıqaıdy, degenimen qarsylasýdyń esh qajeti joqtyǵyn túsinip júrgizýshiniń talaby boıynsha altyn syrǵasyn, saqınasyn, sómkesindegi bar aqshasyn jáne uıaly telefonyn berýge májbúr bolady. Sodan júrgizýshi ony kólikten shyǵaryp, adam qarasy kórinbeıtin jerge tastap ketken», deıdi Medeý aýdandyq ІІB-nyń bastyǵy polıtsııa polkovnıgi Baqyt Qasabekov.
Júrgizýshiniń qurbanyna aınalǵan qyz esh qamyqpastan jaqyn mańdaǵy JJS-na baryp operatorǵa jedel járdem shaqyrýdy jáne shabýyl jasalǵandyǵy jóninde polıtsııaǵa habarlaýdy ótingen. Birneshe saǵat ótken soń jedel sholǵynshylar tonaýshynyń kim ekenin anyqtaǵan. Ol Qapshaǵaı qalasyndaǵy yqsham aýdandardyń birindegi óz páterinde quryqtalǵan.
«Belgili bolǵandaı, bul júrgizýshiniń jasaǵan birinshi qylmysy emes eken. Kúdiktiniń úıinen onyń basqa da tonaýshylyq áreketterge barǵandyǵyn dáleldeıtin aıǵaqtar tabylǵan. Qazir onyń ústinen qaraqshylyq shabýyl faktisi boıynsha qylmystyq is qozǵalýda», dep atap ótti B. Qasabekov.
