Almatyda qaraqshylyq shabýyl jasaǵan qylmyskerler ustaldy
ALMATY. Tamyzdyń 27-si. QazAqparat /Názıra Eleýhan/ - Almatyda 59 jastaǵy zeınetker áje men onyń nemeresine qaraqshylyq shabýyl jasaý oqıǵasy áshkerelendi,
dep habarlaıdy QazAqparat.
Oqıǵa tamyz aıynyń basynda bolǵan. Qurban bolǵandar qalanyń qymbat aýdanyndaǵy úılerdiń birinde, Shymbulaq kóshesinde turǵan. Qylmyskerler osynda zeınetker áıel 28 jastaǵy qyzymen jáne kishkentaı nemeresimen turatyndyǵyn anyqtaǵan.
«Zeınetkerdiń 28 jastaǵy G. esimdi qyzy kásipkerlikpen aınalysqan. Onyń birneshe saýda núkteleri bolǵan. Oqıǵadan bir apta buryn ol bir jas jigitpen tanysqan. Jigit qylmysty tııanaqty josparlap, kelinshek úıinde joq kezde, úıge basa- kóktep kirip, zeınetkerdi baılap tastaıdy. Nemeresin óltirem dep qorqytyp, úıdegi bir mıllıon teńgeden astam aqsha men baǵaly altyn buıymdardy alyp ketken. Baılaýdan bosap shyqqan ana polıtsııaǵa habar bergennen keıin, sol kúni keshke fotorobot jasalynyp, qala kóshelerine ilindi», dedi Almaty qalasy ІІD-niń krımınaldy polıtsııa basqarmasynyń bastyǵy, polıtsııa polkovnıgi Amangeldi Shiderqulov.
Onyń aıtýynsha, qaraqshylar páter jaldap turyp jatqan jerinde ustalǵan. "Eki qylmysker 21 jastaǵy jigit bolyp shyqty. Almaty oblysynan kelgen olar laıyqty jumys taba almaǵandyqtan qylmysqa barǵandaryn moıyndady. Qazir olardyń basqa da osy sııaqty qylmysqa qatysy bar-joǵy tekserilýde", dedi Amangeldi Shiderqulov.
