Almatyda qar jınaýǵa 500-den astam tehnıka jáne 1400 adam jumyldyrylady
ALMATY. QazAqparat - Almaty joldaryna qar jınalyp, muz qatyp, kóktaıǵaq bolýyna baılanysty qala turǵyndaryna eskertý aıtyldy, dep habarlaıdy QazAqparat tilshisi.
Almaty qalasy turǵyn úı saıasaty basqarmasy kólik júrgizýshiler men jaıaý júrginshilerden saqtyq sharalaryn saqtaýdy ótindi.
«Búgin keshten bastap 4 qarashaǵa deıin Almaty qalasynda arty qarǵa aınalatyn jańbyr jaýady. Aýa temperatýrasy mınýs 12 gradýsqa deıin tómendeıdi dep kútilip otyr. 4 qarasha kúni tańerteń tuman túsedi, joldarda kóktaıǵaq bolyp, kúndiz mınýs 6 gradýsqa deıin aıaz bolady»,- dep málimdedi basqarmada.
Qar tazalaý jumysyna barlyǵy 517 arnaıy tehnıka jáne 1400 jol jumysshysy jumyldyrylady.
Kóktaıǵaqty aldyn alý maqsatynda bekitilgen oryndarda keshki ýaqyttan bastap 185 qum shashatyn mashınany kezekshilikke qoıý josparlandy.
«Júrgizýshiler jyldamdyqty báseńdetip, kólik arasyndaǵy qashyqtyqty arttyrǵany abzal. Olar kenetten manevr jasaýdan aýlaq bolǵany, al júrgizý tájirıbesi az júrgizýshiler kólikpen júrýden bas tartqany jón»,- dep naqtylady basqarma.
