Almatyda qar tazalaý boıynsha táýlik boıyna kezekshilik uıymdastyryldy
ALMATY. QazAqparat - Almatyda qar tazalaý boıynsha táýlik boıyna kezekshilik uıymdastyryldy. Bul týraly Almaty ákimdiginde ótken brıfıng barysynda Jasyl ekonomıka basqarmasy basshysynyń orynbasary Dıas Ahmetqalıev aıtty, dep habarlaıdy QazAqparat tilshisi.
Aıta ketý kerek, 16 aqpanda tańǵy 3:00-de Almatyda jaýyn bastalǵan bolatyn. Jaýynnyń arty qarǵa ulasty. Osylaısha qalaǵa 18 sm qar tústi. Taýly aımaqtardaǵy qardyń qalyńdyǵy 90 sm jetti.
Osyǵan baılanysty ákimdik 8 aýdan ákimshiligimen birige otyryp táýlik boıǵy kezekshilik bekitti.
«Kóktaıǵaqty boldyrmaý maqsatynda qala kóshelerine 6911 tonna qum sebildi. Búginde qar 2450 kósheden shyǵarylyp jatyr. Onyń ishinde 219 kóshe - magıstraldy, 171 – aýdandyq, 1928 kóshe jergilikti bolyp otyr. Jalpy uzyndyǵy 2718 shaqyrym jol men 1264 shaqyrym trotýar qardan tazalanyp jatyr», - dedi Dıas Ahmetqalıev.
16 aqpanda jol polıtsııasy kolonnasynyń qatysýymen qar kúreý jumystary bastaldy. Oǵan 600 arnaıy tehnıka men 2500 jumysshy jumyldyryldy.
Almatyda qardyń qalyń túsýinen elektr jelileri úzilgen. «16-17 aqpan aralyǵynda «Alataý jaryq kompanııasy» MKK dıspetcherlik pýltine 201 ótinish túsken. Onyń 164-i boıynsha másele sheshildi. Al 37 ótinim qaralyp jatyr. Elektr jelilerin jóndeýge «AJK» mekemesiniń 9 tehnıkasy, 90 qyzmetkeri jumyldyryldy», - dedi «Almaty qutqarý qyzmeti» mekemesiniń ókili Dmıtrıı Chýhontsev.
