Almatyda qar kúreıtin tehnıkalar jumysqa daıyn – ákim
ALMATY. QazAqparat - Almaty ákimi Baqytjan Saǵyntaev qalalyq kommýnaldyq qyzmetterdiń qysqy kezeńge daıyndyǵy týraly aıtty, dep habarlaıdy QazAqparat tilshisi.
«Biz jýyrda ǵana ákimdikte jaýapty sala qyzmetkerelimen osy máseleni pysyqtadyq. Qar tazalaý jumystaryna 13 merdiger jaýapty. Olardyń biri - «Almaty Tazalyq» qalalyq uıym jalpy kólemniń 60% ózderine alady. Qalǵandary jeke menshik», - dedi ákim «Almaty» arnasynda tikeleı efır barysynda.
Onyń aıtýynsha, kósheler men tratýarlardy qardan tazalaıtyn myń birlik tehnıka daıyn.
«Bizdiń merdigerler qysqy ýaqytta jumys isteý úshin jańa tehnıkalar satyp ala bastady. 2600-den astam jumysshy bar»,– dedi Baqytjan Saǵyntaev.
