Almatyda qar kóshkininen zardap shekken frantsýz eline evakýtsııalandy
ALMATY. QazAqparat - Frantsııanyń Bas konsýly Aleksıs Shahtahtınskıı 13 sáýirde Almaty mańyndaǵy taýlarda qar kóshkini astynda qalǵan Krıstof Petoǵa medıtsınalyq kómek kórsetken ortalyq qalalyq klınıkalyq aýrýhana ujymyna alǵysyn bildirdi, dep habarlaıdy QazAqparat tilshisi.
«Aýrýhananyń bas dárigeri Ulyqbek Medeýbekov bastaǵan barsha ujymǵa kásibı mindetterin adal atqaryp, otandasym Krıstof Petoǵa qajetti medıtsınalyq kómek kórsetkenderi úshin alǵys aıtamyn. Sizge jáne aýrýhananyń árbir medıtsına qyzmetkerine shyn júrekten densaýlyq tileımin» , - dep hat joldapty Bas konsýl.
Belgili bolǵanyndaı, qar kóshkini kezinde zardap shekken Krıstof Petonyń ózi de dáriger. Kóptegen jaraqattaryna qaramastan, ol otanyna evakýatsııalandy.
«Meniń basymnan óte qıyn ári qaıǵyly oqıǵa ótti. Kóshkin astynda qaldym. Aman qaldym. Men qazaqstandyq medıtsına qyzmetkerlerine, sonyń ishinde ortalyq qalalyq klınıkalyq aýrýhana ujymyna óte rızamyn. Aýrýhananyń barlyq mamandaryna kásibıligi, biliktiligi úshin alǵysymdy bildirgim keledi» , - deıdi Krıstof Peto.
Eske salaıyq, 13 sáýir kúni Almaty taýlarynda kóshkin júrip, eki adam qardyń astynda qalǵan bolatyn.
Qutqarýshylar qardyń astynda qalǵan adamdardyń bireýin shyǵaryp aldy.
Sol kúni keshke qaraı qar kóshkininiń astynda qalǵan ekinshi adamnyń denesi tabyldy.
