Almatyda qar kóshkini qaýpine baılanysty taý kýrortynyń biri jabyldy

ALMATY. QazAqparat – Almaty qalasynyń taýly jerlerinde 28 naýryzǵa deıin qar kóshkini júrýi yqtımal, dep habarlaıdy QazAqparat tilshisi.

Almaty qalasynyń tótenshe jaǵdaılar departamenti 26 naýryzdaǵy №10 daýyldy eskertýi negizinde Úlken jáne Kishi Almaty ózenderiniń basseınderindegi jylymyqtyń áseri men qar jamylǵysynyń turaqsyz jaǵdaıyna baılanysty 26-28 naýryz aralyǵynda qar kóshkin qaýpi joǵary deńgeıde saqtalatynyn málimdedi.

Qalalyq TJD-nyń málimetinshe, jyl basynan beri jalpy kólemi 62 myń tekshe metrden asatyn qar kóshkini ózdiginen 60-tan astam ret júrgen. Zardap shekkender bolǵan joq.

Medeý aýdanynyń tótenshe jaǵdaılar basqarmasy men «Qazseldenqorǵaý» qyzmetkerleri birlesip, «Pıoner» taý kýrorty aýmaǵynda monıtorıng júrgizdi. Qazirgi ýaqytta qar kóshkini qaýpi sebebinen taý kýrorty jabyq. Ákimshiligine túsindirý jumystary júrgizildi. Sonymen qatar, demalýshylar men halyqtyń qaýipsizdigin qamtamasyz etý maqsatynda Іle-Alataý ulttyq parkinde (Almarasan, Aıýsaı) kóshkin qaýpi týraly túsindirý jumystary júrgizilip, jadnamalar taratylyp jatyr. Blok-beketteri qoıylyp, «Qazseldenqorǵaý» qyzmetkerleriniń kezekshiligi uıymdastyryldy

, - dep habarlady qalalyq TJD-dan.

Almaty qalasy TJD men «Qazseldenqorǵaý» mekemesi turǵyndardy taýly jerlerge barmaýǵa, qar kóshkinin boldyrmas úshin qarly betkeılerge shyqpaýǵa shaqyrady.