Almatyda qar kóshkini qaýpi saqtalady
ALMATY. QazAqparat – Qar kóshkini qaýpine baılanysty taý bókterine shyǵýǵa tyıym salyndy. Almatyda aýa raıyna baılanysty eskertý jarııalandy, dep habarlaıdy QazAqparat tilshisi.
Almaty qalalyq tótenshe jaǵdaılar departamenti taratqan málimetke qaraǵanda, jylymyqtyń aıasynda jaýyn-shashynnyń túsýine jáne qar jamylǵysynyń turaqsyzdyǵy men qalyńdyǵyna baılanysty Úlken jáne Kishi Almaty sý alaptarynda 19-24 naýryz aralyǵynda qar kóshkini qaýpi saqtalady.
«Kóshkin júrý qaýpine baılanysty qarly tik jartastarǵa shyǵýǵa bolmaıdy. Taýda abaı bolyńyzdar»,- delingen vedomstvanyń habarlamasynda.
«Qazseldenqorǵaý» memlekettik mekemesiniń málimetinshe, Úlken Almaty kóliniń gıdrobeketinde qardyń bıiktigi maksımaldy 96 sm qurady.
Eske sala keteıik, Almatyda keshe túnimen qar jaýdy. Qar jınaý jumysyna arnaıy tehnıka jumyldyryldy.
