Almatyda qańtar oqıǵasynda zardap shekken azamattarǵa 11 mlrd teńge tólendi
«Іshki ister mınıstrligi óz quzyreti aıasynda «qańtar oqıǵalary» boıynsha qylmystyq isterdi tergeýdi jalǵastyrýda. Búgingi tańda ishki ister organdary tergeýshileriniń óndirisinde 758 qylmystyq is bar. Negizgi júkteme Almaty qalasy tergeýshileriniń enshisinde, onda 560 is bar. Jappaı tártipsizdikterdi uıymdastyrǵan adamdar osy protsesterge kóptegen adamdardy maqsatty túrde tartyp, ońtústik astanada urlyq, tonaý jasalýyna jáne qarýdyń jymqyrylýyna yqpal etken. Osy qalada bolǵan jappaı tártipsizdik barysynda shamamen bir jarym myńnan astam ártúrli ǵımaratqa shabýyl jasaldy, 240-tan astam avtokólik búlindi nemese joıyldy», - dedi Sanjar Ádilov Ortalyq kommýnkatsııalar qyzmetindegi brıfıngide.
Onyń atap ótýinshe, tártipsizdikterge qatysýshylardyń tonaý maqsatynda arnaýly tehnıka men aýyr júkti tasymaldaıtyn avtomashınalarmen ákimshilik ǵımarattardyń qorshaýyn, bankter men saýda núkteleriniń qabyrǵalaryn soǵyp qıratý faktileri de bar.
«Adal azamattar kóshelerge shyǵýǵa qoryqqandyqtan birneshe táýlik boıy páterlerinde jasyrynýǵa májbúr boldy. Qalanyń tarıhı-mádenı nysandary taǵylyqqa ushyrady ne búldirildi. Negizinen bul Respýblıka alańynyń mańynda ornalasqan nysandar, olar qazirgi ýaqytqa deıin qalpyna keltirilýde. Al qylmyskerler keltirgen zalal mıllıardtaǵan teńgege baǵalanady», - dedi ol.
Departament bastyǵynyń dereginshe, qylmystyq elementter azamattardyń avtokólikterinen basqa, medıtsınalyq járdem kórsetýge jáne órtterdi oqshaýlaý úshin shaqyrý boıynsha bara jatqan jedel járdem men órtke qarsy qyzmettiń avtomashınalaryn da búldirdi. Munan basqa buzaqylardyń jolyndaǵy turaqtarda turǵan avtomashınalar órtendi. Polıtsııanyń avtomashınalary esh sebepsiz joıyldy jáne tonaldy.
«Qańtar oqıǵalarynyń saldaryn joıý úshin Ulttyq ekonomıka mınıstrligi «Memlekettiń jekelegen óńirlerinde tártipsizdikterdiń nátıjesinde kishi jáne orta kásipkerlik sýbektilerine keltirilgen múliktik zalaldy óteý qaǵıdalaryn» barynsha qysqa merzimde ázirlep bekitti. Memleket Almaty qalasy boıynsha qańtar oqıǵasy barysynda zardap shekken azamattarǵa shamamen 11 mlrd teńge tóledi. Qańtar oqıǵasy barysynda avtomobılderi búlingen Almaty qalasynyń turǵyndaryna taǵy 258 mln teńge tólendi», - dedi Sanjar Ádilov.
