Almatyda qańtar oqıǵasy qurbandarynyń rýhyna Quran baǵyshtaldy

ALMATY. QazAqparat - Erbolat Dosaev Almatynyń Ortalyq meshitinde qasiretti qańtar oqıǵalary qurbandarynyń qyryq kúndigine arnap Quran baǵyshtady, dep habarlaıdy QazAqparat tilshisi.

Bul týraly Májilis depýtaty, aqyn Janarbek Áshimjan Facebook-tegi paraqshasynda jazdy.

Aıta ketsek, búgin tarıhqa «qasiretti qańtar» retinde engen oqıǵalardyń elimizde oryn alǵanyna 40 kún toldy.
«Búgin tańǵy saǵat 8-de Alataýdyń basyn munar, baýyryn órt shalǵan osy qasiretti oqıǵanyń Qyryq kúndigine baılanysty Almaty qalasyndaǵy Ortalyq meshitte árýaqtarǵa baǵyshtap Quran oqylyp, eldiń erteńi úshin tilek tilep, Jaratqanǵa salaýat aıtylypty. Shahardyń jańa basshysy Erbolat Dosaev Qyryq kúndikke arnap árýaqtardyń rýhyna Quran baǵyshtap, tirilerdiń tirshiligi úshin qurban shalypty, nıet qabyl bolsyn! Suraǵan tilekter men kóterilgen bilekterge el Aǵalary, kórnekti tulǵalar - Nurlan Orazalın, Smaǵul Elýbaı, Rahman Alshanov bata beripti. Álginde Almatydaǵy ardaqty aǵamyz Nurlan Myrqasymulyna habarlasyp, amandasqanda osyndaı ımandylyqtyń izgi amaldary jasalǵanyn aıtty. «Qudaısyz qýraı synbaıdy» deıdi. Qıyn ýaqytta qala basshylyǵyna kelgen Azamattyń elge kóńil-qosh bildirip, arýaqtarǵa taǵzym jasaǵany ǵoı» dedi.Jappar Iemiz el-halyqtyń, táspi tartqan taqýalardyń tilek-nıetterin qabyl qylǵaı! Azattyqtyń besigi sanalǵan ańyz, abyz Almatymyzdyń jańǵyrǵan, túlegen sátterine kýá qylsyn, Jaratqan!»,- dep jazdy ol.
Aıta keteıik, búgin tańerteń Memleket basshysy Qasym-Jomart Toqaev Haziret Sultan meshitine baryp, qańtar oqıǵalary kezinde qaıtys bolǵan azamattardyń rýhyna quran baǵyshtaý rásimine qatysty.