Almatyda qant tapshylyǵy qoldan jasalyp otyr - ákimdik
ALMATY. QazAqparat - Almatyda qant aqshaǵa qunyqqan alypsatarlardyń áreketinen qymbattap jatyr. Bul týraly qalalyq Aýyl sharýashylyǵy jáne veterınarııa basqarmasynan málim etti, dep habarlaıdy QazAqparat tilshisi.
Aýyl sharýashylyǵy jáne veterınarııa basqarmasy kún saıyn barlyq sýpermarketterdegi, dúkender men bazarlardaǵy azyq-túlik taýarlaryna monıtorıng jasaıdy. Naryqty kúnde baqylap otyrǵan mamandardyń aıtýynsha, sońǵy apta ishinde qant baǵasy negizsiz kóterilgen.
«Qant baǵasynyń kóterilýi alypsatarlyq sıpatqa ıe. Qanttyń tapshylyǵy týraly aqparattardy estı sala, jetkizýshiler men ótkizýshiler bazardaǵy baǵany ádeıi kóterip jibergen. Alypsatarlar qoldan tapshylyq jasap otyr» - dedi tamaq óndirisi bóliminiń basshysy Damır Tazabek.
Olardyń aıtýynsha, qant baǵasyn tek usaq deldaldar men alypsatarlar kótergen. Anyqtalǵandaı, ónimniń ózindik quny 40% deıin asyrylǵan.
Al iri saýda oryndarynda qant baǵasy kóterilmegen. Sebebi, Almaty turaqtandyrý qory baǵany retteýge tyrysyp otyr.
Turaqtandyrý qory taýar ınterventsııasyn josparly júrgizýde. Onyń ústine, qor otandyq óndirýshilerden taǵy 1,5 myń tonna qant satyp almaq.
Atap ótilgendeı, sýpermarketterde áleýmettik máni bar taýardyń kóterme baǵasy nebári 11% artqan. Qazirgi kezde qaladaǵy qanttyń ortasha baǵasy 245 teńge turady. Almatyǵa jetkiziletin ónimniń ár tonnasy - 220 myń teńge.
Eske salsaq, 1 qazannan bastap Almaty jáne Jambyl oblystarynda 150 myń tonna qant óndiretin 3 zaýyt iske qosylady. Demek, qant tapshylyǵy men onyń baǵasynyń kóterilýine esh negiz joq.
Budan ózge, qazirdiń ózinde qala qorlarynda 10492 tonna qant bar. Olardyń 1,5 myń tonnasy - qoımalarda, 4 myń tonnasy - kásiporyndarda, 2236 tonnasy - ýaqytsha saqtaý alańynda, 2756 tonnasy qalaǵa jetkizilý ústinde.
