Almatyda qansha otbasy ataýly áleýmettik kómek alady

ALMATY. QazAqparat - Almaty qalasynda turatyn turmysy tómen otbasylarǵa qandaı jaǵdaıda ataýly áleýmettik kómek kórsetiledi. Bul týraly Almaty qalasy Áleýmettik ál-aýqat basqarmasynyń otbasylyq ál-aýqat bóliminiń bas mamany Janar Seıfýllına aıtyp berdi, dep habarlaıdy QazAqparat tilshisi.

Spıkerdiń aıtýynsha, elimizdiń áleýmettik-ekonomıkalyq baǵyttaǵy saıasaty - turmysy tómen, múgedektigi bar azamattardy, sonymen qatar kópbalaly otbasylardy qoldaýǵa baǵyttalǵan.

«Almaty qalasynda turatyn turmysy tómen otbasylarǵa, onyń ishinde kópbalaly jáne tolyq emes otbasylarǵa «Memlekettik ataýly áleýmettik kómek týraly» QR Zańyna (budan ári – zań) sáıkes, eger otbasynyń bir múshesiniń tabysy kún kóris deńgeıinen 70% - dan tómen bolsa, ataýly áleýmettik kómek kórsetiledi. 2022 jyldyń 1 toqsanyna kúnkóris deńgeıiniń kólemi 40 925 teńgeni, kúnkóris deńgeıiniń 70% – 28 648 teńgeni quraıdy»,- dedi Janar Seıfýllına.

Onyń aıtýynsha, AÁK 2 túrge jikteledi: shartsyz jáne shartty aqshalaı kómek.

«Shartsyz aqshalaı kómektiń quramynda eńbekke qabiletti músheleri joq otbasylar nemese eńbekke qabiletti músheleri obektıvti sebepter boıynsha jumyspen qamtýǵa járdemdesý sharalaryna qatysa almaıtyn otbasylar alady.

Shartty aqshalaı kómek quramynda eńbekke qabiletti azamattary bar otbasylarǵa kórsetiledi. Áleýmettik kelisimshart jasasý jáne barlyq jumyssyz eńbekke qabiletti otbasy múshelerin jumyspen qamtýǵa járdemdesý sharalaryna mindetti túrde qatysýy mindetti shart bolyp tabylady», - dedi spıker.

Ol atap ótkendeı, ataýly áleýmettik kómekti resimdeý úshin «e-gov» portaly arqyly nemese azamattarǵa qolaıly bolý úshin Basqarmanyń aýdandyq bólimderinde ornalastyrylǵan (mekenjaılary www.usb.almaty.kz saıtynda) Ortalyq mamandaryna belgilengen úlgidegi ótinish pen jeke tólqujat usyný qajet.

Aıta keteıik, jyl basynan beri Almaty qalasy boıynsha 3 513 otbasy ataýly áleýmettik kómek alady, onyń ishinde 1 533 otbasy kópbalaly otbasylar.