Almatyda qansha mektep salynyp jatyr
ALMATY. QazAqparat – Almaty ákimi Baqytjan Saǵyntaev tamyz keńesinde jańa mektepterdiń qurylysy týraly aıtty, dep habarlaıdy QazAqparat tilshisi.
«Karantındik shekteýlerge qaramastan oqýshy oryndarynyń tapshylyǵyn azaıtý jáne qalalyq bilim berý mekemeleriniń jelisin odan ári keńeıtý maqsatynda ótken jyldan bastap biz birden birneshe jobany iske asyra bastadyq», - deıdi Baqytjan Saǵyntaev.
Máselen, qazirgi kezde qalada 12 600 oryndy 8 memlekettik mekteptiń, sondaı-aq qoldanystaǵy mektepter janynan salynyp jatqan 8263 oryndy 17 jańa korpýstyń qurylysy júrýde.
Bıylǵy oqý jylynyń basynda 4150 oryndy 9 jańa korpýs paıdalanýǵa beriledi, 4113 oryndy taǵy 8 jańa korpýs jyl sońyna deıin jumysyn bastaıdy. Sonymen qatar, oqý jylynyń basynda qalada 2120 oryndy 8 jeke menshik mektep ashý josparlanýda.
«Taıaý arada 3500 oryndy taǵy 4 memlekettik mektepti, 4400 oryndyq 11 jańa korpýstardy salý josparda, sonymen qatar jeke ınvestorlarmen birge 4 mekteptiń jobalyq qýatyn ulǵaıta otyryp, renovatsııalaý jáne 6 myń oryndy 5 jeke uıym ashýdy kózdep otyrmyz»,- dedi ákim.
Josparǵa sáıkes seısmıkalyq nyǵaıtý jáne birneshe mektep ǵımarattaryn kúrdeli jóndeý jumystary da jalǵasýda. Sondyqtan oqý úderisine kedergi keltirmeý úshin oqýshylardy ýaqytsha kóshirý uıymdastyryldy.
Keńes barysynda Baqytjan Saǵyntaev Jaıly qalalyq orta basqarmasy men Bilim basqarmasyna birge aǵymdaǵy qurylys pen jóndeý jumystarynyń barysyna tıisti baqylaýdy jáne olardyń ýaqytyly jáne sapaly aıaqtalýyn qamtamasyz etýdi tapsyrdy.
