Almatyda qansha kópbalaly otbasy turady
Almaty qalasynyń Áleýmettik ál-aýqat basqarmasynyń basshysy Nazıra Toǵyzbaevanyń aıtýynsha, megapolıste kópbalaly jáne az qamtylǵan otbasylarǵa arnalǵan «Baqytty otbasynyń» 9 ortalyǵy bar.
« Almatyda 24 426 kópbalaly otbasy turady. Ortalyqtarǵa 4 myń adam tirkelgen. 30 500 almatylyq aqparattyq-konsýltatsııalyq jáne resýrstyq qoldaý aldy, 3 200 ótinish berýshige ádistemelik jáne quqyqtyq kómek kórsetildi, 3 myń turǵyn bazalyq trenıngterden ótti jáne 4 myń turǵyn oqý kýrstaryn aıaqtady»,- deıdi ol.
«Baqytty otbasy» ortalyqtarymen qatar Alataý aýdanynyń az qamtylǵan otbasylaryna arnalǵan dástúrli qolónerdi damytý ortalyǵy jumys isteıdi, onyń maqsaty – balaǵa salt-dástúr, ádet-ǵuryp, qolónerdi úıretý.
«Ortalyqta kópbalaly analar mamandyq ala alady, qazirdiń ózinde 575 áıel kıim dızaıny, kirpik uzartý, manıkıýr, quraq kórpe tigý, tigin jáne massaj kýrstarynan ótip jatyr», – dedi Nazıra Toǵyzbaeva.
Bul dástúrli qolóner ortalyǵyna 1 200 bala keledi.Olarǵa dombyrada oınaýdy, akterlikti, bıdi, qolónerdi úıretedi, balalar orys jáne aǵylshyn, vokal jáne horeografııa kýrstarynan ótedi.
Bul rette qalada «Bastaý bıznes» baǵdarlamasy boıynsha analarǵa kásipkerlik negizderin úıretýge baǵyttalǵan «Іsker Ana» jobasy, sondaı-aq «Eńbek» memlekettik baǵdarlamasy boıynsha qysqa merzimdi kýrstar júzege asyrylyp jatyr.
«Mamandar kópbalaly analarǵa jeke kásip ashýǵa jáne ony júrgizýge kómektesedi. Ol úshin granttar, oqý kýrstary jáne basqa da kómek usynylady. Bolashaqta kásip ashqan soń, kásippen aınalysatyn analarǵa qoldaý kórsetiledi. Búginde komıssııa 757 áıelge grantty maquldady», – dedi spıker.
Áleýmettik ál-aýqat basqarmasynyń basshysy qarttardy qoldaý úshin Almatyda belsendi qartaıýǵa arnalǵan taǵy 9 ortalyq bar ekenin qosty. Olarǵa kúnine 1000-nan astam adam keledi. Munda olarǵa belsendi jáne salaýatty ómir salty tanystyrylady. Zeınetkerler ıoga terapııalyq sabaqtaryna, skandınavııalyq jaıaý júrý jáne jattyǵý terapııasyna qatysady.
