Almatyda qansha dáriger koronavırýspen kúreske jumyldyrylǵan
ALMATY. QazAqparat - Almatylyq dárigerler koronavırýsqa shaldyqqan 1 myńnan astam naýqastyń jaǵdaıyn turaqtandyrdy. Bul týraly onlaın brıfıng barysynda Almaty qalasy qoǵamdyq densaýlyq basqarmasynyń basshysy Narıman Tabynbaev aıtty, dep habarlaıdy QazAqparat tilshisi.
Spıker reanımatologııa jáne anestezıologııa ortalyǵy jumysynyń oń nátıjesin atap ótti.
«Búginde dárigerler 1000-nan astam aýyr naýqastyń jaǵdaıyn turaqtandyryp, olardy reanımatsııa bólimshesinen palataǵa kóshirdi. Mysaly, ortasha aýyr jaǵdaıdaǵy patsıentter sany 2,5 ese — 3 256-dan 1 343 adamǵa deıin tómendedi»,-deıdi ol.
Qalanyń bas dárigeriniń aıtýynsha, Almaty qalasy qoǵamdyq densaýlyq saqtaý basqarmasy kovıd bólimshesinde jumys isteı alatyn mamandar rezervin jasap, turaqty túrde kadr daıyndaıdy.
«Aldyńǵy shepte 1 096 qyzmetker jumys isteıdi (onyń ishinde 235 dáriger, 471 medbıke, 390 kishi medıtsına qyzmetkeri). Búgingi kúni barlyq statsıonar bilikti mamandarmen tolyq jasaqtalǵan, biraq josparlanǵan tósek-oryn qoryn paıdalanǵan jaǵdaıda kadrlarǵa degen qajettilik te artady. Ol úshin búginde mamandardy qaıta daıarlaý boıynsha belsendi jumys júrgizilýde. Árıne, dáriger-ınfektsıonıster, pýlmonologtar, anestezıolog-reanımatologtar jáne epıdemıologtar - koronavırýspen kúreste eń suranysqa ıe mamandar bolyp qala beredi»,- dedi Narıman Tabynbaev.
