Almatyda qańǵybas janýarlardy retteıtin arnaıy baǵdarlama júzege asyrylmaq
ALMATY. QazAqparat - Almatyda úısiz janýarlardyń sanyn gýmanıstik retteý boıynsha jumys bastaldy. Bul týraly onlaın brıfıng barysynda qalalyq Kásipkerlik jáne ınvestıtsııalar basqarmasy basshysynyń orynbasary Damır Tazabek málim etti, dep habarlaıdy QazAqparat tilshisi.
Onyń aıtýynsha, Baqytjan Saǵyntaevtyń ókimimen qańǵybas janýarlardyń sanyn retteý jónindegi komıssııa quryldy. Bul qaladaǵy qaýipsiz epızootıkalyq jaǵdaıdy qamtamasyz etedi, qańǵybas ıtterdiń azamattardy qabý faktilerin azaıtady, sonymen qatar úı janýarlaryn ustaý jaýapkershiligi men mádenıetin arttyrady.
«Bul olarǵa qatygezdik tanytýdyń aldyn alady. Komıssııa quramyna veterınarııa salasyndaǵy ǵylymı qyzmetkerler, Nur Otan partııasy men QHP-nan máslıhat depýtattary, veterınarlyq klınıkalardyń, qoǵamdyq janýarlardy qorǵaý uıymdarynyń ókilderi kirdi. Komıssııanyń birinshi otyrysy 30 shildede boldy. Sonyń nátıjesinde 2021-2024 jyldarǵa arnalǵan Almaty qalasynda qańǵybas janýarlardy adamgershilikpen retteý baǵdarlamasyn maquldandy»,-deıdi spıker.
Almaty qalasy kásipkerlik jáne ınvestıtsııalar basqarmasynyń veterınarııa bóliminiń basshysy Áıgerim Jaqsylyq Komıssııa jumysy men baǵdarlamanyń oryndalýy týraly egjeı-tegjeıli aıtyp berdi.
Onyń sózinshe, ıtter men mysyqtardy aýlaýdyń qazirgi júıesi qańǵybas janýarlardyń ósýin tejeı almaı otyr. Bul rette qańǵybas janýarlar sanynyń ósýine úı ıeleriniń jaýapsyzdyǵy áser etip otyr.
«Qaraýsyz qalǵan janýarlar adasýshylardyń qataryn únemi tolyqtyryp otyrady. Janýarlardyń baqylaýsyz kóshede qalýy jáne azyq-túlik izdegen olar qalaǵa kelip jatyr» - deıdi Áıgerim Jaqsylyq.
Qaraýsyz qalǵan janýarlardy adamgershilikpen retteý baǵdarlamasy aıasynda qalanyń veterınarlyq qyzmetiniń materıaldyq-tehnıkalyq bazasy jańartylmaq, tegin zararsyzdandyrý men chıpteý júrgiziledi.
«Biz halyqaralyq standarttarǵa sáıkes keletin qalalyq veterınarlyq ortalyqtyń qurylysyna ınvestorlardy tartamyz, ustalǵan janýarlar sonda ýaqytsha panalaıdy», - deıdi kásipkerlik jáne ınvestıtsııalar basqarmasynyń ókili.
