Almatyda qańǵybas úı janýarlary kóbeıip ketti
ALMATY. QazAqparat - «Kare-Zabota» QQ prezıdenti ıÝlııa Kovalenko brıfıng barysynda qalada qańǵybas jaýarlardyń nelikten kóbeıip ketkenin túsindirdi, dep habarlaıdy QazAqparat tilshisi.
«Qańǵybas janýarlar sanynyń ósýiniń basty sebebi – adam. Ár túrli zertteýlerge sáıkes, qańǵybas janýarlardyń 85%-y burynǵy úı janýarlary, olardy ıeleri qýyp jibergen nemese joǵaltyp alǵan», - deıdi spıker.
Onyń aıtýynsha, qaladaǵy úı janýarlarynyń jalpy sany áli anyqtalǵan joq.
«2017 jylǵa deıin qalada qańǵybas janýarlardy retteýdiń jalǵyz tásili olardy ustap áketý boldy. Degenmen bul ádis tıimsiz ári gýmandy emes. Qazir qalada qansha qańǵybas janýar bar ekeni belgisiz. Kóptegen elder qańǵybas janýarlar sanyn retteý boıynsha keshendi jumystar júrgizdi, bizde soǵan kele jatyrmyz. Qazir qalada qańǵybas janýarlar sanyn retteıtin baǵdarlama iske asqaly jatyr. Mundaı sharýany memlekettiń qoldaýynsyz iske asyrý múmkin emes»,- deıdi ıÝlııa Kovalenko.
Onyń aıtýynsha, turǵyndar ıt nemese mysyǵy balalaǵan soń ony kóshege tastap ketedi, onyń ary qaraıǵy ómirine jaýapkershilik almaıdy.
« Buǵan jol bermes úshin turǵyndar úı janýarlaryn sterılızatsııadan ótkizip otyrý kerek, biraq oǵan kópshilik aqshasyn qımaıdy. Endi Almatyda qabyldanǵan jańa baǵdarlama aıasynda 45 myńǵa jýyq úı janýary tegin sterılızatsııadan ótedi»,- dedi ol.
