Almatyda qańǵybas ıtterdiń sany jyl saıyn 10 paıyzǵa ósip keledi

Búgin qańǵybas janýarlardyń sanyn retteýdiń 2017-2020 jyldarǵa arnalǵan jańa jobasy ákimdik ókilderine tanystyrylǵan bolatyn.

Sarapshylardyń aıtýynsha, Almatyda 200 myńnan astam qańǵybas ıt pen mysyq bar.

Sońǵy 4,5 jyl ishinde 91 myń qańǵybas janýar, naqtyraq aıtqanda 89 myń ıt pen 2 myń mysyq  aýlanǵan.

Osy ýaqyt aralyǵynda ustalǵan 1 200 janýar qojaıyndaryna qaıtaryldy.

 

Veterınarııa ortalyǵy usynǵan málimetke sáıkes, 2017 jyldyń maýsymynda ǵana 249 janýar ıesine qaıtaryldy.

«Olardyń sany jylyna 10 paıyzǵa artyp keledi. Al ıt qapqan adamdardyń sany jylyna 14 paıyzǵa artýda. Sáıkesinshe, olardyń kesirinen aýrý juqtyryp jatqandar da kóbeıip barady. Negizgi sebepteri adamdardyń ózinde jatyr. Kóbine adamdar olardy dalaǵa qańǵyrtyp jiberedi.  Sonan soń olardyń sany dalada baqylaýsyz artyp barady. Adamdardy bul úshin jazalaýdyń eshqandaı zańdy tetigi joq», - dedi sarapshylar keńesiniń qatysýshysy Maksım Gandrabýra. 

Osy ózekti máselelerdi zertteı kele sarapshylar Qazaqstandaǵy qańǵybas janýarlardy ustaý júıesin túbegeıli ózgertý kerektigin aıtyp otyr.

Jańa jol kartasy gýmanızm qaǵıdattaryna saı jasalǵan.

Atap aıtqanda, janýarlardy aýlaý olardyń densaýlyǵyna zaqym keltirmeýi tıis ári qojaıyndaryna tez qaıtarylýy kerek. Sondaı-aq, sarapshylar zań jobasyna ózgeris engizýdi josparlap otyr.

 

Aıta ketý kerek, Almatyda byltyr sáýirde 3 jastaǵy qyz balany qańǵybas ıtter talap óltirgen bolatyn. Oqys oqıǵadan soń qaladaǵy ıtterdi aýlaý protsesi jyldam júrgizile bastady. Sondaı-aq, jaqynda «Veterınarııa ortalyǵy» MKK aımaǵynda qyzmetkerlerdiń biriniń kóliginde haskı tuqymdy ıt ólip qalǵan bolatyn.

Keıinirek qalalyq aýyl sharýashylyǵy jəne veterınarııa basqarmasynan habarlaǵandaı, kəsiporynnyń dırektory Salavat Bektemisov jumysynan bosatyldy.