Almatyda qandaı jaǵdaıda lokdaýn engiziledi

ALMATY. QazAqparat - Almaty qalasynyń bas memlekettik sanıtarlyq dárigeri Jandarbek Bekshın Almaty qandaı jaǵdaıda tolyqtaı karantınge jabylatynyn aıtty, dep habarlaıdy QazAqparat tilshisi.

Jandarbek Bekshın shekteý sharalaryn jalǵastyrý kerektigin basa aıtty.

«Búginde bizde 3400 tósek-oryn bar, olardyń júktemesi 40 paıyzdan aspaıdy. Sonymen qatar, 7 myń rezerv tósek bar, biraq rezervter de taýsylýy múmkin. Aýrýhanaǵa táýligine 5000 adam jatqyzylsa, onda bir ınkýbatsııalyq kezeń ishinde barlyq tósek-oryndardy tolyǵymen alamyz. Buǵan jol berýge bolmaıdy. Eger kúnine 300 naýqas jatqyzylsa da, qala lokdaýnǵa jabylady. Ýaqtyly sharalar qabyldamasaq, onda, árıne, barlyǵyn tolyǵymen jaýyp, toqtatýǵa týra keledi. Bizdiń mindetimiz - buǵan jol bermeý», - dedi ol ZOOM konferentsııasy barysynda.

Eske salaıyq, 10 naýryzda Almaty «qyzyl» aımaqqa endi. Karantın rejımi qalada 13 naýryzdan bastap kúsheıtildi. Almaty qalasynyń bas memlekettik sanıtarlyq dárigeri Jandarbek Bekshın megapolıs mektepterinde synyptaǵy oqýshylar sany 25-ten aspaıtynyn aıtqan bolatyn.

Sonymen qatar, ótken demalys kúnderi, ıaǵnı 13 jáne 14 naýryzda, qalada qoǵamdyq kóliktiń jumysy toqtatyldy.