Almatyda qandaı jaǵdaıda qatań shekteý sharalary engiziledi
ALMATY. QazAqparat - Almaty ákimi Baqytjan Saǵyntaev qalada shekteý sharalary qandaı jaǵdaıda kúsheıtiletinin aıtty, dep habarlaıdy QazAqparat tilshisi.
Baqytjan Saǵyntaev «Almaty» telarnasyndaǵy Akimat LIVE tikeleı efırinde koronavırýstyń yqtımal jańa tolqynyna jol bermeý úshin kásipkerlerge qatysty qatańdatý sharalary qabyldanýy múmkin ekendigin jetkizdi.
«Biz karantındik shekteý sharalarynan eki ret óttik. Kóktemde tótenshe jaǵdaı jarııalandy, jazda shekteý sharalaryn qoldandyq. Eger úshinshi ret oralýymyz kerek bolsa, oǵan da daıynbyz. Biz barlyq sharalardy qandaı jaǵdaıda, qandaı shekteý sharalary qaıtarylatyndyǵyn aldyn ala belgilep qoıdyq», – dedi Baqytjan Saǵyntaev.
Sonymen qatar, ákim búginde qalanyń bas sanıtarlyq dárigeriniń qaýlysymen engizilgen sharalar óz kúshinde qalyp, ózgermeıtindigin atap ótti.
«Biz muny koronavırýs juqtyrǵandardy aýrýhanaǵa jatqyzý arqyly anyqtaımyz. Bizdiń klınıkalarǵa 250-den astam naýqas jatsa, birden shekteý sharalaryn qabyldaımyz. Vırýstyń búkil qalaǵa taralmaýyn qadaǵalaımyz. Mindetti túrde shekteý sharalaryn qoldanamyz. Sonymen qatar, almatylyqtar da vırýstyń aldyn alýǵa óz kómekterin tıgizýi kerek»,– dedi Baqytjan Saǵyntaev.
