Almatyda qandaı nysandardyń qorshaýy saqtalady
ALMATY. QazAqparat - Almaty ákimdigi qorshaýlardy alyp tastaý boıynsha jumystarǵa belsene kiristi. Alaıda keıbir nysandarda qorshaý sol qalpy qalady, dep habarlaıdy QazAqparat tilshisi.
Qalalyq Sáýlet jáne qala qurylysy basqarmasy málim etkendeı, tek qoǵamdyq paıdalanýǵa kedergi keltirip otyrǵan qorshaýlar ǵana alynyp tastalady.
Máselen, saıabaq, skver, aıaqjol, úı aınalasyndaǵy qorshaýlar, bıznes ortalyqtardaǵy, saýda oryndaryndaǵy qorshaýlar buzylady.
Negizgi maqsat ortalyq jáne magıstraldy kóshelerdegi qorshaýlardy alyp tastaý bolyp otyr.
«Qorshaýsyz qala» aktsııasyna barlyq JOO-lar qosylady.
Alaıda keı oqý oryndarynyń aldyndaǵy shlagbaýmdar qalady. Sebebi, bul oqytýshylar men stýdentterge arnalǵan turaq oryndaryn ajyratýǵa qajet.
«Qaladaǵy qorshaýlardy alyp tastaý megapolıstiń syrt kelbetin jaqsarta túsedi. Sondaı-aq azamattarǵa qoǵamdyq oryndardy asha túsedi. Alaıda, bul barlyq nysandardyń qorshaýy alynyp tastalady degen áńgime emes. Mektep, balabaqsha, basqa da kúzetýdi talap etetin áleýmettik nysandardyń qorshaýy buzylmaıdy. Endi atalǵan qorshaýlarda beınekameralar ornatylady»,- dedi basqarmadan.
Búginde bilim berý oshaqtarynyń qorshaýlary buzylyp jatqan joq.
QR Qurylys normalary men erejeleri boıynsha orta bilim berý nysandarynyń jer telimderi bıiktigi 1,5 metrden kem bolmaıtyn dýalmen qorshalýy tıis. Sondaı-aq dýaldyń kireberisinde oqýshylardyń syrtqa jol ústine júgirip shyǵýyna kedergi keltiretin qural bolýy shart.
«Quqyq qorǵaý organdary, ІІB, prokýratýra, áskerı bólimder ornalasqan ǵımarattardyń qorshaýy alynbaıdy. Sebebi, munda qarý-jaraq bar»,- dedi basqarma ókilderi.
Sonymen qatar, qorshaýy alynbaıtyn nysandardyń biri - Botanıkalyq baq bolmaq.
«Birinshiden, bul nysan QR BǴM botanıka ınstıtýtynyń qaramaǵynda, ekinshiden, munda sırek kezdesetin ósimdikter ósiriledi», - dedi mamandar.
Qala ákimdigi basqa nysandardaǵy qorshaýlardy buzý jumystary jalǵasa beretinin aıtty.
Tek qana qorshaý emes eski dińder, jarnama taqtaıshalary, eski baǵanalar alynyp tastalady.
