Almatyda qandaı nysandar dezınfektsııaǵa jabyldy
ALMATY. QazAqparat - Almatyda ótken onlaın brıfıng barysynda Áýezov aýdany ákiminiń orynbasary Renat Keneev 20-21 maýsym kúnderi aýdanda qandaı nysandar jumysyn toqtatqanyn málimdedi, dep habarlaıdy QazAqparat tilshisi.
Áýezov aýmaǵynda barlyq saýda oıyn-saýyq ortalyqtarynyń, saýda úıleriniń, saýda ortalyqtarynyń, bazarlardyń, sport zaldarynyń jumysy toqtatylady. Qyzmeti toqtaǵan barlyq nysandarda sanıtarlyq-profılaktıkalyq jáne epıdemııaǵa qarsy sanıtarlyq sharalar júrgizilip jatyr.
«Qazir bizdiń dárigerlerimiz, polıtseıler men tirshilikti qamtamasyz etetin kásiporyn qyzmetkerleri kúsheıtilgen rejımde qyzmet etýde. Men bárin olardyń eńbegine qurmetpen qaraýǵa shaqyramyn. Bizdiń aýdannyń turǵyndarynan halyqty koronavırýs ınfektsııasynan qorǵaýǵa qajetti májbúrli sharalarǵa túsinistik tanytýlaryn jáne baıyppen qaraýlaryn suraımyn», - dedi Almaty qalasynyń Áýezov aýdany ákiminiń orynbasary Renat Keneev.
Aýdanda Asia Park, Sputnik Mall, Almaty Mall, Grand Park, Moskva metropolitan SOO jáne 8 basqa saýda ortalyǵy: Lıýmır, Úsh Suńqar, Masato, City jáne basqa 19 saýda úıi jumystaryn toqtatty, olardyń arasynda Armada, Car City, Tıgrohaýd, AvtoSıtı, 12 mesıatsev bar.
4 bazar: Arystan, Sary – Arqa, Aqsaı – 3, Tıgrohaýd jáne 17 sýpermarket Magnum, SMALL, Ramstor, Metro jáne basqalary. Sonymen birge 28 sport kesheni D-fitness, FitnessBlitz, Invictus jumystaryn toqtatty.
Sonymen birge, adamdardyń kóp jınalýyn boldyrmaý úshin azamattardyń demalys kúnderi jappaı dem alýǵa keletin oryndary jabyldy.
Naqtyraq aıtqanda, skverler (4 shaǵyn aýdanda Sary-Arqa kınoteatynyń syrtynda, jáne Altynsarın dańǵyly boıynsha Qabdolov kóshesinen bastap Jandosov kóshesine deıin)
8 shaǵyn aýdandaǵy jaıaý júrginshiler aımaǵy, Family Park saıabaǵy, Saıran ózeniniń batys bóligi jabyq tur.
Túrksib aýdany ákiminiń orynbasary Ermek Beıseýovtiń aıtýynsha, aýdan aýmaǵynda barlyq sýpermarketter, oıyn-saýyq jáne saýda ortalyqtary, bazarlar jabyldy jáne qoǵamdyq kólik qozǵalysy toqtatyldy. Dámhanalar men meıramhanalar sanıtarlyq normalardy saqtaǵan jaǵdaıda jazǵy terrasamen jumys isteıdi. Saıabaqtarǵa, qoǵamdyq baqtarǵa, áýejaı janyndaǵy kól jaǵalaýyna, Sport jáne oıyn alańdaryna barýǵa tyıym salynady.
«Qosymsha karantındik sharalardyń engizilýine baılanysty 20 maýsym kúni saǵat 14.00-de Túrksib aýdanynyń 780 myń sharshy metr aýmaǵynda dezınfektsııa jumystary júrgizildi. Oǵan 30 kóshe, úsh saıabaq, 11 skver, bir jaǵalaý, alty bazar, 10 fıtnes ortalyq, tórt bıznes ortalyǵy jáne tórt sýpermarket kirdi. Úlken saýda ortalyqtaryna keletin bolsaq, olar úsheý, dezınfektsııa keshki 21.00-den keıin júzege asyrylady», - dedi Ermek Beıseýov.
Dezınfektsııaǵa 30 tehnıka, 50 dezınfektsııalaýshy qyzmetkerler jáne 460 lıtr dezınfektsııa quraldary jumsaldy. BUU basshysy ótken táýlikte koronavırýsty juqtyrýdyń kóp sany tirkelgen kúni dep málimdedi. Osyǵan baılanysty, sizderden qosymsha karantın sharalaryn qatań túrde saqtaýdy, túsinistikpen qaraýlaryńyzdy suraımyz«, - dedi Almaty qalasy Túrksib aýdany ákiminiń orynbasary Ermek Beıseýov.
Aıta keteıik, búgin Almatyda barlyq aýdanda dezınfektsııalyq sharalar júrip jatqanyn habarlaǵan bolatynbyz.
